• Тәнтәнә
• 10 Тамыз, 2017

Транспорт хадимлири кәспий мәйримини нишанлиди

Шәмшидин АЮПОВ, «Уйғур авази»/ Йәкшәнбә күни Қазақстандики транспорт саһасиниң хадимлири кәспий мәйримини атап өтти. Бу мәйрәм болупму «Алмутиниң дәрвазиси» дегән нам алған җәнубий пайтәхтниң Түрксиб наһийәсидә дағдуғилиқ нишанланди. – Түрксиб наһийәси шәһәрниң санаәт-транспорт райони болуп һесаплиниду. Чүнки бу территориядә Мәркизий Азиядә тәңдиши йоқ чоң аэропорт, заманивий төмүр йол вокзали, икки муниципиал автобус парки вә бирқатар чоң санаәт карханилири орунлашқан, – деди тәнтәнидә сөзгә чиққан наһийә һакими Владимир Устюгов. –  Әйнә шуларда әмгәк қиливатқан барлиқ транспорт хадимлирини кәспий мәйрими билән чин қәлбимдин тәбрикләймән. Бу күни мәйрәм егилириниң намиға иллиқ тиләклирини ейтқучилар көп болди. Җүмлидин җумһурийәтлик «Уйғур авази» гезитиниң баш муһәррири Ершат Әсмәтов өз коллективи вә җумһурийәтлик Уйғур этномәдәнийәт мәркизи намидин иллиқ ләвзини билдүрүп, төмүрйол саһасиниң бир түркүм хадимлириға ҖУЭМниң Пәхрий ярлиқлирини тапшурди. «АЗМК Group» ҖЧЙ мудирлар кеңишиниң рәиси, «Нур Отан» партияси Сәясий кеңишиниң әзаси Әхмәтҗан Шардиновму сәмимий тәбригини ейтқач, транспорт саһасиниң айрим илғарлириға хатирә соғиларни һәдийә қилди. Бу күни шундақла Алмута шәһәрлик мәслиһәтниң депутати, Қазақстан хәлқи Ассамблеясиниң әзаси, җумһурийәтлик Уйғур этномәдәнийәт мәркизиниң башқарма әзаси Болат Оспанов хәлиқара «Қазақ тілі» җәмийити Алмута шәһәрлик шөбисиниң «Қазақ тілі» медали билән мукапатланди. Тәнтәнә давамида сәнъәт һәвәскарлири коллективлири вә кәспий иҗрачилар нахша-сазлирини, уссуллирини тәғдим қилип, жиғилғанларға мәйрәмлик кәйпият беғишлиди.