• Әхбаратлар еқими
• 17 Тамыз, 2017

 «Ат» фильми чүширилиду

Астанадин 150 километр шималда «Equus» фильми чүшириливатиду. «Equus» сөзи латин тилидин тәрҗимә қилғанда «ат» дегән уқумни билдүриду. Мәзкүр һөҗҗәтлик фильмдиму мошу җанивар вә униң цивилизация тәрәққиятиға қошқан һәссиси тоғрилиқ һекайә қилиниду. Фильм үч қисимдин ибарәт болуп, униң һәрбири мәлум тарихий дәвиргә беғишланған. Фильм чүшириливатқан Ерназар йезисиниң йенида ботай мәдәнийитиниң мәйдани бар. Алимлар вә фильм чүшәргүчиләр топи ишләватқан мәйданни йеқинда әхбарат вә коммуникацияләр министри Дәурен Абаев зиярәт қилди. – Бу — чәтәллик шериклиримиз билән әмәлгә ашурулуватқан чоң илмий лайиһә. «Equus» фильминиң режиссери атақлиқ археолог, антрополог Найоби Томпсон. Картинини чүширишкә АҚШ, Канада, Германия вә Франция охшаш мәмликәтләр қатнишиватиду. Лайиһини мәбләғ билән тәминләшниң нурғун қисмиму шуларниң зиммисидә, – деди Дәурен Абаев. Фильмни чүшириш җайи сүпитидә Қазақстанниң таллавелиниши тәсадипи әмәс. Нәқ мошу йәрдә атниң дәсләпки қетим қолға үгитилгәнлиги илмий җәһәттин испатланди. Шуни тәкитлигүмиз келидуки, әгәр өз вақтида қазақстанлиқ көрнәклик археолог Виктор Зайберт мошу йеңилиқни ачмиған болса, мәзкүр фильмму чүширилмәтти. «Equus» фильмида рольларни қазақстанлиқ каскадерлар иҗра қилиду. Шундақла картина үстидә ишләшкә бизниң реквизиторлар, кийим-кечәк бойичә рәссамлар җәлип қилинип, улар қедимий дала көчмәнлириниң образлирини вуҗутқа кәлтүриду. «Equus» фильми 2018-жили октябрьдә дунияниң әллик мәмликитидә намайиш қилиниду. Инглиз тилида болсиму, һазирниң өзидә рәсмий тизер-трейлер моҗут. Муәллипләр лайиһиниң Қа­зақстанниң кино, туризм саһасини, тарихимиз билән хәлқимиз әнъәнилирини хә­лиқара мәйданда тонуш­турушқа ярдәм бериди­ғанлиғиға үмүт қилиду. Миллий әнъәниләр роһида Президент Нурсултан Назарбаев «Қазанат» ипподромини зиярәт қилди. Дөләт рәһбири оқъя етиш бойичә «Алтын жебе» хәлиқара турнирда болди. Мәзкүр турнир «ЭКСПО-2017» Хәлиқара ихтисаслаштурулған көргәзмисиниң комплекслиқ мәдәний вә спорт чарә-тәдбирлири программиси даирисидә өтти. Нурсултан Назарбаев шундақла ипподром территориясидә орунлашқан «Этноаул» миллий-мәдәний комплексини көздин кәчүрди. Бу йәрдә Дөләт рәһбиригә комплекс меһманлирини қазақ хәлқиниң миллий таамлири, касипчилиғи, спорт оюнлири, урпи-адәт вә әнъәнилири билән тонуштуридиған экспозицияләр намайиш қилинди. Миллий банк рәисини қобул қилди Қазақстан Президенти Миллий банк рәиси Данияр Ақышевни қобул қилди. Учришиш давамида Дөләт рәһбиригә Миллий банкниң мәмликәтниң малийә секторини сағламлаштуруш бойичә паалийитиниң йәкүни тоғрилиқ һесават берилди. Қазақстан Президенти һазир миллий валютини әркин алмаштуруш курси сәяситиниң жүргүзүлүватқанлиғини тилға елип, Миллий банкниң инфляцияниң өсүшигә йол қоймаслиқ бойичә вәзиписини алаһидә тәкитлиди. Данияр Ақышев Нурсултан Назарбаевқа валюта вә малийә базарлиридики әһвал тоғрилиқ доклад қилди. – Умумән, вәзийәт турақлиқ. Август ейиниң бешидики ички вә ташқи характердики айрим амиллар тәсиридин болған өзгирип турушлардин кейин алмаштуруш курси турақлашти. Тәшвиш үчүн һечқандақ асас йоқ, – деди Миллий банк рәиси.