• Дидар ғенимәт
• 24 Тамыз, 2017

Сеғиниш отлирини бесип...

Мәшүр САСИҚОВ, «Уйғур авази»/ Өткән пәйшәнбә күни Алмута шәһиридики «Исмайил» кафесида һазирқи М.Яқупов намидики 101-мәктәп-гимназиясини буниңдин 50 жил илгири тамамлиған синипдашларниң учришиши болуп өтти. Синипдашлар дәсләп бир-бири билән хошаллиқлар илкидә көрүшкәндин кейин, дуниядин өткән тәңтушлири билән устазлириниң роһиға дуа-тәгбир қилди. Андин тәшәббускарлар тәрипидин йейилған кәң дәстихан әтрапида сеғиниш отлирини бесип, пуғани қанғичә муңдашти. Султанқорған мәһәллисидики мәзкүр билим дәргаһини ана тилида түгәткән ака-һәдиләрниң сани 20 болған екән. Уларниң һәммиси дегидәкла алий вә оттура билим елип, җәмийитимиз тәрәққиятиға биркишилик һәссисини қошупту. Көпчилиги бова-мома аталған бүгүнки мәрасим меһманлири һазир һөрмәтлик дәм елишта жүрсиму, хәлқимизниң ғемини қилип, җәмийәтлик ишлардиму паалийәтчанлиқ көрситиватиду. Мәсилән, уларниң арисида Замандин Баратовни алсақ, у буниңдин бираз жиллар илгири Әвезов наһийәлик Уйғур мәдәнийәт мәркизигә рәһбәрлик қилип, жутдарчилиқ ишлириниң җанлинишиға вә миллий урпи-адәтлиримизниң сақлинишиға көп күч чиқарди. Буниңдин ташқири, у башқиму мәдәний чарә-тәдбирләрниң тәшәббускари болуш арқилиқ көпчиликниң алқишиға еришти. Бүгүнки «Дәм ғенимәт — дидар ғенимәт» дәмлириниң пәйзини сүрүватқанлар арисида мошундақ әзимәтләр хелә нурғун екән. Әлвәттә, бу инсанларниң әҗридин көпчилик чәксиз миннәтдар екәнлиги сөзсиз. Барчиға һәқиқәтәнму унтулмас дәмләрни беғишлиған бу учришиш меһманлири «бүгүн бар, әтә йоқ» бу заманда өзара дидарлишиш пурситини һәдийә қилған тәшәббускар синипдашлири — Қурванбүви Йүсүповаға, Рашидәм Һәмраеваға, Гүлистан Зәйналоваға вә Гүли Садиқоваға миннәтдарлиғини билдүрүп, келәчәктә имканқәдәр пат-пат учришип туруш истигидә хошлашти.