• Концерт
• 31 Тамыз, 2017

Яш кәлсә ишқа...

  Қазақстан Җумһурийитидә яшаватқан милләтләрниң мәдәнийитини, тилини вә сәнъитини риваҗландурушқа толуқ шараит яритилған. Буниңдин биз, уйғурларму, чәттә қалмайватимиз дейишкә толуқ асас бар. Мәсилән, сәнъитимиздики йеңилиқлар, болупму җай-җайларда өткүзүлүватқан концертлар билән конкурслар, йеңидин қурулуватқан һәрхил театрлар тоғрисидики хәвәрләр һәркимни хошал қилиду. Мошу йеқинда, йәни җумһурийитимиз пайтәхти Астана шәһиридә өтүватқан Хәлиқара ЭКСПО — 2017 көргәзмисигә беғишлинип вә 30-август – Конституция күни һарписида яш талант егилири Илзат Абдусуванов, Гүлсәнәм Мәшүрова вә Рустәм Тохтахуновниң уюштурушида Туздыбастав мәһәллисиниң Мәдәнийәт өйидә «Келәчәк юлтузлири» намлиқ концерт болуп өтти. Жуқурида исми аталған үч шәхс яш сәнъәткә йеқин, қени орғуп турған яшлардин болғачқа, сәнъәткә иштияқ бағлап, сәһнигә әндила қәдәм ташлиған өсмүрләрниң чоң сәһниләрдә көрүнүп, талантини ашуруш, келәчәктә сәнъитимизниң вә муқәддәс сәһнимизниң йоруқ юлтузлириға айлинишиға шараит яритиш һәм йол ечиш мәхситидә ушбу лайиһини қолға алди. Сәһнигә биридин кейин бири чиқип, өз һүнәрлирини көрсәткән кичик достларға қарап кимниңла болсун амрақлиғи кәлди. Бөшүктин әндила бели чиққан кичик қиз-оғулларниң әвришим уссуллири, ейтқан нахшилири, миллий саз-әсвапларда әркин ойниши һәммини қайил қилди. Концертта хәлқимизниң сөйүмлүк иҗрачилири  — Абликим Турсунов, Әхмәтҗан Тайиров, Әзиз Симетов иштрак қилип, нахша-сазлардин чачқа чачти. Ахирида тамашибинлар намидин нахшичи, продюсер Артур Илахунов сөзгә чиқип, бүгүнки концерт программисини уюштурған яшларниң ишиға утуқ тилиди. Өз новитидә, уюштурғучилар концертниң утуқлуқ өтүшигә йеқиндин ярдәм қолини сунған Туздыбастав мәһәллисиниң Уйғур этномәдәнийәт мәркизиниң рәиси Реһимҗан Мәсимов вә Шахмурат Һашимовқа вә шундақла қатнашқучи гөдәкләрниң ата-анилириға чәксиз минәтдарлиғини билдүрди. Альбина ӘМӘТОВА.