• Яднамә
• 31 Тамыз, 2017

Қәдирданларни әсләп

Дост хатириси/ Мошу йеқинда биз Чоң Ақсу оттура мәктивини тамамлап, һаятқа учум болғинимизниң 40 жиллиғини синипдашлар билән атап өттуқ. Икки күн давамида әстин чиқмас оқуғучилиқ дәвримизниң талай қизиқ вақиәлирини әсләп, өзимизни йәнә мәктәп партисида олтарғандәк һис қилдуқ. Бизгә пухта билим, аңлиқ тәрбийә бәргән устазлиримизниң әқлиянә несиһәтлири һаятниң дағдам әмәс йолида талай қетим әсқатқанлиғини бир-биримизгә бәс-бәс билән һекайә қилип бәрдуқ. Әпсус, бизгә әшундақ тәрбийә бәргән устазлиримизниң көпчилиги һазир аримизда йоқ. Лекин қолумизға қәләм-қәғәз тутқузуп, йезиш вә оқушни үгәткән устазимиз Гүлсүмхан Мушрапилова билән йәнә мәктәп партисиға олтарғанда, тил билән ейтип йәткүзгүсиз кәйпият илкидә болдуқ. Пурсәттин пайдилинип, Гүлсүмхан һәдини вә шу арқилиқ барлиқ устазлиримизни Билим күни вә йеңи оқуш жилиниң башлиниши билән тәбрикләймиз. Бизниң 40 жиллиқ учришишимиз һәқиқәтәнму тәсирлик вә қизиқ өтти. Бирақ... Әйнә шу «бирақ» бизниң көңлүмизни ғәш қилған йери бар. Синипдашлиримиздин бәши һаяттин бәкму әтигән кәткәнлигини ойлисақ, өзимизни қояр җай тапалмай қалимиз. Улар Нәсирдин Әмруллаев, Алимҗан Пәйзуллаев, Гүлистан Мәсимова, Ғалийәм Семәтова вә Нурванәм Мулюкова. Һәммиси ақкөңүл, кәмтар инсанлардин еди, бирақ бу һаят, немишкиду, уларға күлүп бақмиди, һәтта Нурванәмниң сүритиниму тапалмидуқ. Өлүмгә һечқандақ чарә йоқ. Биз, тирикләрниң, қолидин келидиғини пәқәт мәрһумларни әсләп, уларниң роһиға дуа-тәгбир қилишла екән. Биз, синипдашлар, әйнә шу пәрзимизни әта қилиш үчүн мәрһум достлиримизни йәнә бир қетим әсләп өтүшни тоғра көрдуқ, халас! Рәһбәр СУЛАЙМАНОВ, Нурәхмәт СУЛТАНОВ. Чоң Ақсу йезиси, Уйғур наһийәси.