• Йеңилиқлар
  • 03 Тамыз, 2012

Һазирчә үч алтун

Өткән җүмә күни Лондонда ХХХ Олимпиада оюнлири тәнтәнилик ечилди. 205 мәмликәттин он миңдин ошуқ спортчи қатнишиватқан Оюнлар 12-августқичә давамлишиду. Тәнтәнилик ечилиш мәрасимида бизниң байриғимизни палван Нурмахан Тинәлиев көтирип маңди. Умумән, қазақстанлиқ олимпиадичилар бу қетимқи төрт жиллиқ мусабиқисида өз алдиға хелә җиддий вәзипиләрни қоймақта, йәни үч алтун медальни қошуп һесаплиғанда, 12-13 медаль йеңивелип, дәсләпки 30 мәмликәтниң қатаридин орун елишни нийәт қиливатиду. Әслитип өтимизки, 2008-жили Беҗинда өткән язлиқ Олимпиадида җумһурийитимиз спортчилири 13 медальға сазавәр болған еди. Шундақ қилип, икки һәптидин ошуқ пүткүл сәйярә ишқивазлириниң диққәт нәзәри Темза дәриясиниң қирғиғидики шәһәрдә өтидиған мусабиқиларға қадилиду.

 

Оюнлардин хәвәрләр

Олимпиада рекордини орнатти

Лондонда өтүватқан Оюнларда кореялик ячи Им Донг-Хьюн Олимпиада рекордини орнатти. Гәп шуниңдики, у қарғу болсиму, Паралимпиада оюнлириға әмәс, бәлки Олимпиада оюнлириға қатнишиватиду. Дәсләпки басқучта Им Донг-Хьюн 699 пайға егә болуп, өзиниң алий дуниявий нәтиҗисини үч пайға яхшилиди. Шу түпәйли Корея талланма командисиму дуниявий рекорд орнатти. Им Донг-Хьюн рәсмий һалда қарғу болуп һесаплиниду: униң көзи бари-йоқи он пайизла көриду. Им Донг-Хьюнниң тәкитлишичә, у «нишанни сусла көриду, бирақ униңдики рәңләрни пәриқ қилалайду вә туйғусиға асаслинип атиду».  

Баш-пана сориди

Лидс шәһириниң полициясигә өзини Олимпиадиға қатнишиватқан спортчи дәп тонуштурған әр киши телефон қилип, Бүйүк Британиядин сәясий баш-пана сориди. Спортчиниң исми намәлум, амма униң Шәрқий Африка әллири бириниң вәкили екәнлиги ениқ. Һәр еһтималға қариғанда, у Олимпиадиға пәқәт алтә адәмла елип кәлгән Судан талланма командисиниң әзаси болуши мүмкин. Бирақ мошу мәмликәтниң Олимпиада командиси бу вәзийәткә мунасивәтлик һеч қандақ изаһ бәрмәйватиду. Шундақ қилип, бу африкилиқ Оюнларни уюштурған мәмликәттин сәясий баш-пана сориған биринчи спортчидур. Бүйүк Британияниң һакимийәт орунлири ундақ илтимасларниң көп болидиғанлиғини күтмәктә. Мәсилән, 2000-жили өткүзүлгән Сидней Олимпиадисида 35 спортчи сәясий баш- пана сорап, 62 спортчи хәвәрсиз жүтүп кәткән еди.  

Командидин қоғланди

Футбол бойичә Швейцария талланма командисиниң әзаси Мишель Морганелла өз Твиттерида Җәнубий Корея талланма командисини һақарәтлигәнлиги үчүн командидин қоғланди. У иҗтимаий тор сайтида швейцарияликләр Җәнубий Корея командисидин 1:2 һесави билән йеңилип қалғандин кейин, мундақ һақарәтлик сөзләрни қалдурупту: «Мениң Җәнубий Кореяниң барлиқ хәлқини уруп-соққум келиду. Улар — әқил-еси дурус әмәс команда». Шуниңдин кейин у әқлигә келип, иҗтимаий тордики сөзлирини өчиривәткән болсиму, сөзләр Интернетқа тарқап үлгәргән екән. Мошуни байқиған Швейцария Олимпиада командисиниң рәһбири Морганеллани командидин чиқириветишни мувапиқ көрүпту.

 Судьяларниң хаталиғи

Лондондики оюнларда мундақ вақиәму йүз бәрди. Спорт гимнастикиси бойичә Украининиң әрләр талланма командисиға бронза медали тапшурулуп, бир нәччә сааттин кейинла уни тартивалди. Дәсләптә хуласә протоколида украинилиқлар японлардин 0,274 балл үстүн болуп, үчинчи орунни егилигән еди. Амма судьялар япониялик Кохея Утимура сәкрәп чүшкән эпизодни қайта көргәндин кейин, хатаға йол қойғанлиғини чүшинип, униңға берилгән дәсләпки баһани йәнә 0,7 баллға ашуриду. Бу болса, азияликләрни төртинчи орундин иккинчи орунға чиқириду. Шундақ қилип, японияликләр Оюнлар ғоҗайини британияликләрдинму өтүп кетиду. Бүйүк Британия гимнастлири күмүч медальниң орниға бронза медалиға рази болиду.   

643 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы