• Мөтивәрләр
• 14 Қыркүйек, 2017

Анилар билән гөзәл бу аләм

Шәмшидин АЮПОВ, «Уйғур авази»/ Ядиңлардиму, көрнәклик язғучи Һезмәт Абдуллин өз һекайилириниң биридә ачарчилиқтин кейин кигиз қетиға бир бурда гирдә нанни тиқип қойған гөдәкни тәсвирләйду. Мабада мәзкүр һекайидики мисраларни шу хилдики дәртләрни тартқан адәмләр оқуса, көз-яш қилидиғанлиғи тәбиий. Шундақ мөтивәрләрниң бири — Султанқорған мәһәллисиниң турғуни Сәвринисәм Раҗибаева. У 1932-жили илгәрки Челәк наһийәсиниң Қаратуруқ йезисида туғулған. Төрт-бәш айлиқ вақтида ата-аниси Алмута шәһиригә көчүп келиду. Сәвринисәм йәттинчи синипни тамамлиғанда, билим елишқа мүмкинчилиги болмиғанлиқтин, Алмута шәһиридики 2-тикинчилик фабрикисиға ишқа орунлишиду. У мошу саһада оттуз жил әмгәк қилди. Шу жиллири “Әмгәк илғари” дәп етирап қилинип жүргән уйғур қизи бирдинла көпчиликниң етивариға елиниду. Фабрика рәһбәрлиги уни өзи билән биллә ишләватқан комсомол-яшларға рәһбәр қилип сайлайду. У һәрқандақ қийинчилиқларға бәрдашлиқ берип, бар күч-ғәйритини адил әмгәккә сәрип қилди. Әмгигиму мунасип баһалинип, онлиған Пәхрий ярлиқ, Миннәтдарлиқ вә бирқатар медальлар билән тәғдирләнди. Әң әвзили, у өзиниң меһриванлиғи, меһмандостлуғи вә әмгәксөйгүчлүги түпәйли жутдашлири арисида һөрмәткә бөләнди. Нураний аниниң бәхит-шатлиғи болуп йетилгән бәш пәрзәндиму һаяттин мунасип орун егилиди. 11 нәврә вә 32 чәврисиму момисиниң алдида шат-шадиман жүгришип жүриду. Болупму, үч яшлиқ чәвриси Альмира момисиға әркиләп, йенидин кәтмәйду. Мундақ пәйтләрдә нураний аниниң чирайи техиму ечилип, үзидә шатлиқ тәбәссүм җилвә қилиду. Сәвринисәм ана бәзидә әшу әлтәк чәвриси билән қошулупла кичик бала охшаш оюнға киришип кетиду. Гайида уни қешиға олтарғузувелип, гезит вә китап оқуп бериду. Гезит демәкчи, Раҗибаевлар гезитхумар вә китапхумар аилә. Йерим әсирдин буян «Уйғур авазиниң» турақлиқ оқуғучиси. Бийилму бу аилә биринчиләрдин болуп гезитқа муштири болди. Пәқәт анилар билән гөзәл болған бу дунияда, әлвәттә, уни чүшәнгән һәм билгән адәмгә аниниң тәвәррүк қоллирини сөйүп һәм униң хизмитини қилип яшашниң өзиму чоң бәхит. Буни қутлуқ өйниң чириғини йеқиватқан оғли Руслан билән келини Меһриванниң бәхтияр һаятидинму байқидуқ. Бийил 85 яшниң үзини көргән нураний ана бала-чақисиниң еқидисидин бәк рази. Сөһбәт давамида ғәмгүзар ана һаятиниң давами болған пәрзәнтлири билән милләт ғеми билән яшаватқан әзимәтлиримизгә вә хәлқимизгә течлиқ-аманлиқ тиләп, дуа қилди. Һә, бизму аниға аманлиқ вә саламәтлик тиләп, униңда: “Сиз кәби барлиқ нураний анилиримизниң бөшүк нахшиси мәңгүгә яңрисун”, дегүмиз келиду. СҮРӘТТӘ: Сәвринисәм ана чәвриси Альмираға уйғур хәлиқ чөчәклиридин бирини оқуп бериватиду.