• Әхбаратлар еқими
• 14 Қыркүйек, 2017

Қериндашлиқ вә өзара чүшәнчә роһида

Нурсултан Назарбаев Астанаға рәсмий сәпәр билән кәлгән Түркия Җумһурийити Президенти Реджеп Тайип Эрдоған билән музакириләрни жүргүзди. Дөләт рәһбири Реджеп Эрдоғанни Қазақстан йеридә иллиқ қарши алди вә рәсмий сәпәр билән келиш, шундақла Ислам һәмкарлиқ тәшкилатиниң Пән вә технологияләр бойичә саммитиға қатнишиш тәкливини қобул қилғанлиғи үчүн миннәтдарлиқ билдүрди. Қазақстан Президенти Түркия Президентиниң мәмликитимизгә қилған ахирқи сәпири вақтида ихтисат саһасида бирқатар келишимләрниң қолға кәлтүрүлгәнлигини, қобул қилинған келишимләрни әмәлгә ашуруш бойичә чоң ишларниң жүргүзүлүватқанлиғини тәкитлиди. Униңдин ташқири Нурсултан Назарбаев Сириядики қураллиқ тоқунушни биртәрәп қилиш бойичә Астана җәрияниниң алтинчи басқучиға диққәт ағдурди. Реджеп Эрдоғанму бу учришишниң муһим екәнлигини тәкитлиди вә Женева музакирилириниң беришиға иҗабий тәсир қилидиғанлиғиға үмүт билдүрди. Униңдин ташқири Түркия Президенти Қазақстан рәһбиригә регионлуқ проблемиларни һәл қилишқа қаритилған течлиқпәрвәрлик паалийити үчүн алаһидә миннәтдарлиқ билдүрди. Реджеп Эрдоған Қазақстан вә Түркия оттурисидики иккитәрәплимә музакириләр тоғрилиқ гәп қилип, өз мәмликитиниң Қазақстан билән ихтисадий, сәясий, мәдәний, һәрбий-санаәт саһалиридики өзара һәрикәт үчүн барлиқ күчини сәрип қиливатқанлиғини тәкитлиди. Түркия Президентиниң Қазақстанға қилған рәсмий сәпириниң йәкүни бойичә бирқатар муһим һөҗҗәтләр имзаланди.