- Йеңилиқлар
- 10 Тамыз, 2012
Алтунниң сани алтигә йәтти
Мана икки һәптидин бу ян пүткүл дунияниң диққәт-нәзәри Бүйүк Британияниң пайтәхти Лондонда — мошу шәһәрдә өтүватқан XXX язлиқ Олимпиада оюнлирида болмақта. Лондон Олимпиадисида спортниң бир нәччә түри бойичә мусабиқиға чүшүватқан жутдашлиримиз бизниң чүшлиримизгиму кирмәйдиған әҗайип нәтиҗиләрни қолға кәлтүрүватиду десәк, бу пикиргә гезитханлиримизниң бесим көпчилиги қошулиду, дәп ойлаймиз. Мәсилән, оюнлар һарписида қазақстанлиқлар җәзмән үч алтун, җәми 12-13 медаль билән дәсләпки оттуз команда тәркивигә киришни көздә тутқан болса, Олимпиадиниң дәсләпки күнлиридә жутдашлиримизниң қол йәткүзгән нәтиҗилири пәқәт алтун медаль бойичә мәҗбурийәтни икки һәссә ошуқ орунлиғанлиғини көрсәтти. 9-август күнигә қәдәр қолға кәлтүрүлгән нәтиҗиләр бойичә қазақстанлиқ олимпиадичилар умумий командилиқ һесапта 11-орунда келиватиду. Уларниң әнчисидә һазирчә алтә алтун вә икки бронза медали бар.
Гезитханлиримиз дәсләпки үч алтун медальни кимләрниң йеңивалғанлиғини вә кимләрниң шәрипигә көк байриғимиз көтирилип, гимнимизниң орунланғинини яхши билиду. Кейинки үч алтун медальни бизгә еғир атлетлар Светлана Подобедова (75 килограммғичә болған салмақ дәриҗиси) вә Илья Ильин (94 килограммғичә), шундақла йеник атлетчи Ольга Рыпакова һәдийә қилди. Униңдин ташқири Светлана билән Илья йеңи Олимпиада рекординиму орнатти.
Алтә алтун медальдин кейин биз бронза медалиғиму сазавәр болдуқ. Грек-рим күриши бойичә 84 килограммғичә болған салмақ дәриҗисидә күч синашқан Даниял Гаджиев грузиялик палван Владимир Гегешидзени тиз пүктүрүп, бронза медалини асти.
Әпсус, спортниң мошу түри бойичә оюнларға қатнишиватқан Асхат Дилмухамедов (74 килограммғичә), Нурмахан Тыналиев (120 килограммғичә), Алмат Кебиспаев (60 килограммғичә) биз күткән нәтиҗиләргә йетәлмиди.
Боксчилар турнири Олимпиадида әң узаққа созулидиған мусабиқә. Шуниң билән бир қатарда у биз үчүн әң қизиқарлиқтур. Чүнки қазақстанлиқ бокс ишқивазлири жутдашлиримизниң спортниң бу түридә һәр қандақ дәриҗидики турнирларда һеч қачан медальсиз қалмайдиғанлиғиға үгинип қалған.
Боксчилиримиздин Серик Сапиев (59 килограммғичә), Әдилбек Ниязметов (89 килограммғичә), Иван Дычко (91 килограммдин ошуқ) йерим финалға йолланма алди. Уларниң әнчисидә әң болмиғанда бронза медали бар дегән сөз. Йәнә бир боксчимиз Марина Вольнова болса, йерим финалда америкилиқ Кларесса Шельдстин йеңилип қелип, бронза медалиға қанаәт һасил қилди.
Әпсус, Биржан Жақыпов (49 килограммғичә) билән Данияр Елеусинов (64 килограммғичә) чарәк финалда рәқиплиридин йеңилип қалди.
Умумий көрсәткүч бойичә 9-августқа қәдәр медаль сани бойичә Хитай (36 алтун, 22 күмүч, 19 бронза), АҚШ (34, 22, 25) вә Бүйүк Британия (22, 13, 13) алда келиватиду.
Шөһрәт МӘСИМОВ.
Оюнлардин хәвәрләр
Алтун медаль үчүн миллион доллар
Россиялик дзюдочи Мансур Исаев Олимпиада чемпиони аталғини үчүн бир миллион АҚШ доллирини алиду. Униңға мошунчилик миқдарда мукапат пули берилидиғанлиғи Челябинск вилайәтлик активиниң губернатор Михаил Юрьевич билән өткүзгән учришишида мәлум болди. Учришишта вилайәт рәһбириниң шундақла күмүч медальға сазавәр болған спортчиға йүз миң, бронза медальни йеңивалғанға 50 миң АҚШ доллири миқдарида мукапат беридиғанлиғи мәлум болди.Бир әсирдин кейин кәлгән мукапат
Бүйүк Британияниң спорт гимнастикиси бойичә әрләр командиси топ-тоғра йүз жилдин кейин Олимпиада мукапитини елишқа сазавәр болди. Улар спортниң мошу түри бойичә ахирқи медальни 1912-жили йеңивалған еди. Шу чағдиму британияликләр бронза медалиға сазавәр болған, дегән мәлуматлар бар.Медалини сундурувалди
Бразилиялик дзюдочи Фелипэ Китадаи мусабиқилардин кейин меһманханиниң жуюнуш бөлмисидә бронза медалини сундурувалди. Әйнә шу вақиәгә бағлиқ Бразилия делегациясиниң рәһбири Хәлиқара Олимпиада комитетидин медальни алмаштуруп бериш тоғрилиқ илтимас қилди.
568 рет
көрсетілді0
пікір
