• Әхбаратлар еқими
• 21 Қыркүйек, 2017

Тиҗарәтчи  ханим-қизлар  баш қошти

Гөһәрбүви ИСМАЙИЛҖАНОВА, “Уйғур авази”/  Панфилов наһийәлик һакимийәтниң мәҗлисләр залида яркәнтлик тәдбирчан аяллар «дүгләк үстәл» әтрапида баш қошти. Наһийәниң иҗтимаий-ихтисадий тәрәққиятиға өз һәссисини қошуватқан ханим-қизларниң иш-паалийитини тәһлил қилиш, өзара тәҗрибә алмаштуруш,  мәслиһәтлишип иш көрүш мәхситидә уюштурулған баш қошушни Алмута вилайәтлик «Ишбиләрмән аяллар» җәмийәтлик бирләшмиси рәисиниң орунбасари «Ирада-балық» ширкитиниң мудири Сүрийәм Һезимова  киришмә сөз билән ачти . Баш қошушта дәсләп сөзгә чиққан Алмута вилайәтлик «Ишбиләрмән аяллар»  җәмийәтлик бирләшмисиниң рәиси Рима Салықова җәмийәтлик тәшкилат әзалириниң иш-паалийитидин хәвәрдар қилип, қолға кәлтүрүватқан утуқлирини тилға алди. Алмута вилайәтлик «Атамекен» Тиҗарәтчиләр палатиси мудириниң орунбасари Алмагүл Оңғарбаева болса, елимиз  Президенти Нурсултан Назарбаевниң беваситә рәһбәрлиги билән әмәлгә ашурулуватқан дөләт программилири тиҗарәтчи ханим-қизларниң иш- паалийитини  техиму яхшилашқа қаритилғанлиғини алаһидә қәйт қилип, яркәнтлик тиҗарәтчи ханим-қизлар шу дөләт программилири даирисидә йеңи-йеңи лайиһиләрни әмәлгә ашурушта қизғинлиқ көрситиватқанлиғини тәкитләп өтти. Тиҗарәтчи ханим-қизларға дөләт программилириниң мәзмун- маһийити толуқ чүшәндүрүлди. Болупму бәлгүлүк лайиһиләрни әмәлгә ашуруш үчүн  «Даму» фонди арқилиқ иккинчи дәриҗилиқ банклар  несийә  беришниң мәхсус программиси һәққидә әтраплиқ ейтилди. Вилайәт мәркизидин кәлгән җавапкәр хадимлар яркәнтлик тиҗарәтчиләрни ойландуруватқан соаллириға җавап берип, тиҗарәтни тәрәққий әткүзүш амиллирини ейтип бәрди. Панфилов наһийәси.