• «Мәшъәлниң» меһмини
• 28 Қыркүйек, 2017

Ақ-қарини пәриқ қилишқа тиришайли

Җәмийитимиздә заманға қарап, адәмләрниң һаят тәрзи өзгирип кәтти. Униң үстигә яшлиримиз һәрхил сериаллардики һаятлиқни арман қилип яшайдиған тәрәпкә өтти, дегән гәпләрни тола аңлайдиған болдуқ. Чоңқур ойлинип қарисақ, бу һәқиқәткә толиму уйғун келиватқандәк. Мүмкин, заманимиз өзгәрсиму өзгәргәнду. Бирақ һазирқи заман яшлириниң реал өмүрдин ваз кечип, өзлирини, худди шу сериаллар билән Интернет торлирида көрситиливатқан фильмлардики адәмләргә охшаш, яшаш хаһиши, биртәрәптин, уларниң аң-сезимиға әксичә тәсир йәткүзсә, йәнә бир яқтин, «шу фильмлардики актерларниң кийим-кечигини кийидиғандимән», дәп униңсизму ихтисадий әһвали ешип-тешип турмиған ата-анисиға хелила еғирчилиқ салмақта. Бу, очуқ ейтсақ, бүгүнки күндики әң актуал мәсилиләрниң биригә айланди. Һәқиқәт шуки, сериаллардики өмүр — режиссерларниң тамашибинларни дәрһал җәлип қилиш үчүн ойдин чиқарған амили. Шуңлашқа биз яшлиримизниң әшу кинофильмларда көрситилгән һаят бизниң реаллиғимизға тамамән охшимайдиғанлиғини чүшәндүрүп, уларниң дорамчилиққа берилип кетишиниң алдини елишимиз лазим. Шуниң билән биллә яш әвлат вәкиллирини йеңи заманниң пайдисиз тәрәплиригә берилмәй, әксичә, илим-пән дуниясиға интилип, өзлириниң келәчигини ойлашқа чақириш ошуқ болмиса керәк. Шу чағдила биз жуқурида тәкитлигән илләтләрдин сақлиналаймиз. Тәкитләш лазимки, ХХІ әсирниң йеңи технологияси инсанлар һаятини түп-асасидин өзгәртти. Һазир йеши тохтиған чоңларни ейтмиғанниң өзидә, бели әндила бөшүктин чиққан сәбиләрму янфонни, худди шуниң билән туғулғандәк, пайдилиниду. Әнди мәктәп оқуғучилириға келидиған болсақ, уларниң һечқайсиси һаятини янфонсиз тәсәввур қилалмайду. Һә, буниң һәммиси яшларниң сәвийәсигә сәлбий тәсир йәткүзүпла қоймай, психикисини бузидиған әһвалларғиму елип келиватиду. Бир сөз билән ейтқанда, мутәхәссисләрниң пикричә, һазир бизниң “садиқ һәм ишәшлик” достумизға айланған янфонлиримиз бизгә қанчилик пайда кәлтүрүватқан болса, зийиниму шунчилик охшайду. Демәк, буниңдин тоғра йәкүн чиқиришни биләйли! Рашидәм МИРЗӘХМӘТОВА.