• «Мәшъәлниң» меһмини
• 28 Қыркүйек, 2017

Уйғур яшлириниң паалийәтчанлиғи ашмақта

Җумһурийәтлик Уйғур этномәдәнийәт мәркизи йенидики Қазақстан Уйғур Яшлири Бирлиги өз низамнамиси асасида җошқун паалийәт елип бериватқан җәмийәтлик тәшкилатларниң бири. Униң җумһурийәт даирисидә  ишләватқиниға 15 жилдин ашти вә 2012-жилдин тартип Уйғур мәдәнийәт мәркизиниң яшлар қанити болуп һесаплиниду. Тәшкилат җумһурийәт бойичә 15 шөбигә вә вакаләтханиға егә болуп, Қазақстан хәлқи Ассамблеясиниң паалийитигә актив иштрак қиливатиду. Бүгүнки күндә Қазақстан Уйғур Яшлири Бирлигидә он кеңәш ишләйду. Тәшкилатқа илғар пикирлик уйғур яшлири, студентлар, яш тиҗарәтчиләр, шаирлар вә язғучилар әза. Яшлар арисида хәлқимизниң мәдәнийитини тәшвиқ қилиш, җумһурийәттә милләтләрара разимәнликни мустәһкәмләш, уйғур яшлириниң һәрхил алий оқуш орунлирида билим елиши үчүн шараит яритиш — тәшкилатниң әң асасий әвзәлликлиридин болуп һесаплиниду. Һазирқи күндә Қазақстан Уйғур Яшлири Бирлигиниң  Қазақстан хәлқи Ассамблеяси йенидики «Жарасым» яшлар тәшкилати билән бирликтә  Президентниң «Келәчәккә нишан: мәнивий йеңилиниш» мақалиси асасида җай-җайларда һәрхил чарә-тәдбирләрни уюштуруватиду.