• Йеңилиқлар
• 05 Қазан, 2017

Үч бағчиниң лентиси қийилди

Гөдәкләргә соға/ Сабирәм ӘНВӘРОВА, «Уйғур авази»/ «Балапан» программиси даирисидә балиларни мәктәп йешиғичә тәрбийиләш вә оқутуш мәһкимилири билән тәминләштә Уйғур наһийәси вилайәт бойичә алдинқи орунларниң бирини егиләйду. Бу, биринчидин, тәвәдики гөдәкләрниң яхши тәлим-тәрбийә вә билим елиши үчүн һәртәрәплимә шараит яритиливатқанлиғидин далаләт бәрсә, иккинчидин, наһийә даирисидә тиҗарәт саһасиниң риваҗлинип, ишсизлар саниниң азийиватқанлиғини көрситиду. Мәсилән, өткән һәптидә Уйғур наһийәсидә үч балилар бағчисиниң лентиси қийилип, йеңидин иш башлиди. Җүмлидин Ават йезисида «Самұрық», Шуңқар йезисида «Болашақ» вә Сүмбә йезисида «Балдәурен» балилар бағчисиниң ечилиш мәрасимлири болуп өтти. Мәзкүр жутларда биринчи болуп ечилған шәхсий бағчиларниң тәнтәнилик ечилиш мәрасимиға наһийә һакими Шөһрәт Нурахунов, наһийә һакиминиң орунбасарлири, мәслиһәт кативи, «Нұр Отан» партияси наһийәлик шөбиси рәисиниң орунбасари, ақсақаллар вә йеза турғунлири қатнашти. Ават йезисиниң ишбиләрмән турғуни Әрмидин Тайиров ачқан 25 орунлуқ «Самұрық» балилар бағчисидин йеза хәлқи толиму миннәтдар болушти. Әнди Шуңқар йезисидики 25 орунлуқ «Болашақ» бағчисиниң егиси Жаңил Турдахунова йеңи башланмиси билән 12 адәмни турақлиқ иш билән тәминлиди. Нуриса Сыдықова болса, Сүмбидики «Балдәурен» балилар бағчисини ечиш үчүн иҗаригә өй елип, 25 орунлуқ мәркәзни ишқа қошуп, ата-аниларниң изгү тиләклиригә бөләнди.