• Нәшрият төһписи
  • 12 Қазан, 2017

Кона мәдәнийәт билән бүгүнки әмәлият җәмләнгән

Журналниң йеңи сани/ Мухтәрҗан ҖУМАРОВ, «Уйғур авази»/ Миллий нәширлиримизниң қатариға «Иҗаткар» намлиқ әдәбий-публицистикилиқ, илмий-аммибап журналниң қошулғиниға анчә көп вақит болмиди. Шундақ болсиму, пәқәт өзигила хас алаһидиликләргә егә болған бу нәшир һәққидә көпчилик ләвзидин яхши пикирләрни аңлап келиватимиз. Бәзиләр уни йөнилиши, мәзмун-маһийити җәһәттин өткән әсирниң 80 — 90- жиллири ана тилимизда йоруқ көргән «Пәрваз» мәҗмуәсигә, «Арзу» журналиға охшитип, өтмүшкә нисбәтән кинәш-тәшналиқлирини қандурушқа зәмин яритиватқанлиғи билән қәдирлисә, бәзиләр «кона сандуқтики әңгүштәләрни» яш әвлатқа көрситип, улардин үлгә елишқа үндәп келиватқанлиғини жуқури баһалимақта. Һәқиқәтәнму, «Иҗаткар» мәвсүмлүк нәшрини қолиға алған журналхан, униң әҗдатлар билән әвлатлар арисида көрүк вәзиписини атқуруп, кона мәдәнийәт билән бүгүнки әмәлиятни бағлаштурушқа күч селиватқанлиғини бирдин һис қилиду. Буниңға мәзкүр журналниң йеқинда йоруқ көргән йеңи сани билән тонушуш җәриянидиму толуқ көз йәткүзүш мүмкин.  Мәсилән, бу қетим униңда Турған Тохтәмов, Абдрим Әхмәдий, Кинтал Исламов, Зунун Қадир, Зәйнидин Йүсүпов охшаш һәрхил саһаларда әмгәк қилип, утуқ-муваппәқийәтләргә еришкән мәрһум әдипләрниң иҗадийитигә, улар һәққидә йезилған әслимиләргә орун берилгән. Шуниң билән биллә, нәширниң чиқишиға мәсъул шәхсләр бүгүнки таңда давамлиқ қәләм тәвритип келиватқан бирқатар пешқәдәм шаир-язғучиларниму диққәт нәзәридин чәттә қалдурмиған. Ениғирақ ейтсақ, Абдуғопур Қутлуқов, Йолдаш Азаматов, Алимҗан Бавдинов вә уйғурлар арисида өскән қазақ хәлқиниң көрнәклик шаири Нурлан Оразалин охшаш көрнәклик әдипләрниң иҗадий әмгәклириниң бесилиши әйнә шуниңға купайә. Журнал тәһрирати пәқәт чоңларғила көңүл бөлүп қалмастин, шундақла әдәбият мәйданида әндила көрүнүшкә башлиған бир түркүм яшларниң иҗадийити билән тонушушқиму имканийәт яритиду. Қисқиси, шаир һәм журналист Әхмәтҗан Исрапиловниң тәшәббуси түпәйли барлиққа келип, Малик Мәһәмдиновниң баш муһәррирлигидә нәшир қилиниватқан «Иҗаткар» журналиниң новәттики саниғиму, жуқурида қәйт қилғинимиздәк, кона мәдәнийәт билән бүгүнки әмәлият қачиланған.

272 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы