• Көргәзмә
  • 12 Қазан, 2017

«Азия аһаңлири»

Мәшүр САСИҚОВ,  «Уйғур авази»/ Өткән җүмә күни Алмута шәһиридики Ә.Қастеев намидики мирасгаһта хәлқимиз арисидин чиққан талантлиқ рәссам, Қирғиз Җумһурийитигә хизмәт көрсәткән сәнъәт әрбаби Тәлъәт Миррәхимовниң йәккә көргәзмиси ечилди. Шуниңға мунасивәтлик өткүзүлгән тәнтәнидә бир топ шәхсләр, җүмлидин мирасгаһ мудири Гүльмира Шалабаева, Чайковский намидики музыка училищесиниң мудири Биржан Хасанғали, Қирғиз Җумһурийити Жогорку Кенешиниң сабиқ депутати Турсунтай Сәлимов, «Аттан, Қазақстан» һәрикитиниң рәһбири Амантай қажы Асылбек, «Уйғур авази» гезитиниң баш муһәррири Ершат Әсмәтов вә ушбу көргәзминиң асасий тәшәббускари һәм уюштурғучиси болған «Тиҗарәтчиләр вә Санаәтчиләр йеза егилиги хадимлири» ассоциациясиниң президенти Дилмурат Кузиев сөзгә чиқип, рәссамниң иҗадий паалийитигә әтраплиқ тохталди. Мәлумки, Тәлъәт Миррәхимов тарихий Вәтинимизниң Ғулҗа тәвәсидә дунияға кәлгән. У кичигидин тәбиәткә вә шу гөзәл тәбиәт мәнзирилирини рәсим арқилиқ тәсвирләшкә ашиқ болуп өсиду. Кейинирәк бу саһада билим елип, асасән туғулуп өскән ана жутиниң тәбиитини тәсвирләп, уни сәнъәтхумар мухлисларға йәткүзүшкә интилиду. Шундақла узун жиллиқ иҗадий паалийитидә сизилған һәрхил мавзулардики әмгәклири униң иккинчи вәтинигә айланған Қирғизстандики Иссиқкөл вә Нарин тағлири қатарлиқ мәнзирилик җайлар билән чәмбәрчас бағлиқ. Шу түпәйли Тәлъәт Миррәхимовниң шиҗаәтлик иҗадий издинишлири бәдилигә кәлгән әмгәклиригә мәһлия мухлислириму йетәрлик екән. Биз буни көргәзминиң ечилиш тәнтәнисигә жиғилған көпчиликниң шу қәдәр нурғунлиғидин ениқ байқидуқ. Бу көргәзмигә рәссамниң атмишқа йеқин әсәри қоюлупту. Рәссамниң ички дуниясидин һәм униң талантидин далаләт беридиған әмгәклирини көпчилик һөзүрлиниш илкидә тамашә қилди. Тәкитләш лазимки, Тәлъәт Миррәхимов өз иҗадийитидә асасән натюрморт жанриға алаһидә көңүл бөлиду. Әлвәттә, бу рәссамниң башқа жанрлардики әсәрлири төвән дәриҗидә дегәнлик әмәс. Әксичә, униң барлиқ жанрларни өз ичигә алған онлиған әмгәклири Оттура Азия дөләтлиридин ташқири жирақ чәт әлләрдә өткән чоң-чоң көргәзмиләрдиму жуқури баһалинип кәлмәктә. Әлвәттә, Тәлъәт Миррәхимовниң һәрхил жилларда сизған әсәрлириниң һәрбиригә алаһидә тохтилиш мүмкин әмәс, амма уларниң һәрбиридә миллийликниң бар екәнлигини ениқ. Хошна әлдин қәдәм тәшрип қилған рәссамдин сөһбәт елишқа алдириған аммивий әхбарат васитилириниң хадимлири аз болмиди. Уларниң арисида мәнму болдум. — Тәлъәт ака, растини ейтиш керәк, биз бу мирасгаһта өткән көплигән рәссамларниң көргәзмисигә пат-пат келип туримиз. Амма, немишкиду, бүгүн бу йәргә адәмләр хелила нурғун кәпту. Буниң сири немидә дәп ойлайсиз? — Өзәңлар билисиләр, мән яш рәссам әмәс. Йәнә бир тәрәптин, өзәмни махтап қояй, тәҗрибәмму йетәрлик. Әнди, әң муһими, буниң һәммиси мошу көргәзминиң «отидин кирип, сүйидин чиқиватқан» инимиз Дилмурат Кузиевниң әҗри дәп ойлаймән. Әйнә шундақ милләтпәрвәр вә сәнъәтниң қәдрини билидиған инсанларниң тәшәббуси билән бүгүн көпчилик мениң әсәрлирим билән тонушуш һәм бәһирлиниш пурситигә егә болуватиду. Пурсәттин пайдилинип, мошундақ чоң көргәзмини уюштурушқа ярдәмләшкән Дилмурат билән «Капчигай Хим Монтаж» компаниясиниң мудири Ришат Имрәмзиевқа вә Турғанҗан Махмудовқа миннәтдарлиғимни изһар қилимән. — Сиз нәқ һазир иҗадийитиңиздә асасән қайси мавзуларға мураҗиәт қиливатисиз? — Яш йәткәнсири ана жутни кинәйдиған охшайсән. Кейинки вақитларда көпирәк ана-топраққа мунасивәтлик әмгәкләр үстидә ишләш маңа раһәт беғишлайду. Болупму мени униң тәбиити билән адәмлириниң турмуш-тирикчилиги бәкму қизиқтуриду. Буниңдин ташқири, умумән, дуниядики йеңилиқлар вә изи қалған қедимий дәвир һәққидә рәсим сизсам қайтидин туғулғандәк болуп қалимән. —            Сөһбитиңизгә рәхмәт!

360 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы