• Бизниң сөһбәт
• 19 Қазан, 2017

Бәхитҗан БӘХТАХУНОВ:  «Почта хизмити һечқачан өз әһмийитини йоқатқан әмәс»

Адәмләрниң аманитини бир-биригә йәткүзүп, жирақни йеқинлаштуруватқан почта хизмитиниң роли алаһидә. Билидиғиним, бу саһаниң хадимлири маашиниң азлиғиға қаримай, саһадин қол үзмәй, язниң аптивида, қишниң қара соғида хәлиқниң хизмитидә болмақта. Мана шундақ өз кәспигә иштияқ бағлиған, җан озуғи болған гезит-журналлиримизни һәрбиримизниң өйигә вақти-вақтида йәткүзүп бериватқан инсанларниң әмгиги һәққидә көп ейтиливәрмәйду. Мана мошу бошлуқни толтуруш мәхситидә «Қазпочта» акционерлиқ җәмийитиниң Уйғур наһийәлик шөбисиниң рәһбири Бәхитҗан Турсун оғли БӘХТАХУНОВ билән сөһбәттә болған едуқ. Сабирәм ӘНВӘРОВА, «Уйғур авази» — Бәхитҗан Турсун оғли, алди билән сизни барлиқ гезитханлар намидин 60 яшлиқ тәвәллудиңиз билән тәбрикләймиз. — Рәхмәт! — Әгәр сир болмиса, сизниң почта саһасини таллавелишиңизға немә сәвәп болғанлиғиға тохталсиңиз? — Һәммимизгә мәлумки, почта хизмити қайси заманда болмисун, өз әһмийитини йоқатқини йоқ. Уни пәқәт адәмләр арисидикила әмәс, дөләтләр оттурисидики чоң көрүк дәп чүшинимән. У 1999-жили 20-декабрьда «Қазпочта» акционерлиқ җәмийити болуп қайта қурулди. Һазир елимиздә «Қазпочта» саһасиниң қәдри техиму ешип, униң иши күндин-күнгә җанлиниватиду. Мениң бу саһаға болған қизиқишим наһайити үстүн. Андин мәзкүр саһани яхши көрүмән. — Елимиздә «Қазпочтиниң» бүгүнки тәрәққияти һәққидә немә ейтқан болар едиңиз? — Шүбһисизки, мән саһаға кәлгән жиллири почта хизмити дәл бүгүнкидәк әһвалда болмиған. Һазирқи нәтиҗигә йетиш үчүн почта саһасиниң хадимлири талай қийинчилиқларни, мурәккәп җәриянларни баштин кәчүрди. 2006-жили февраль ейидин башлап «Қазпочта» АҖниң дөләтлик акцияси «Самрұқ-Қазына» фондиға өтти. Почта саһаси 2003-жили қобул қилинған «Әйнә шуниңдин буян почта тоғрилиқ» қанунға мувапиқ, тез сүръәттә риваҗлинишқа башлиди. Ейтип өтмәсликкә болмас, 1874-жили 22 әлниң башланмиси билән қурулған Дуниявий почта иттипақиға бийил 143 жил толиду. 1992-жилниң август ейидин башлап, Қазақстан ушбу иттипақниң әзаси. Аләм тәрәққияти билән бирликтә почта саһасиму йеңилиқларға толуп-ташти. Бара-бара заманивийлашти. Почта саһасиниң йеңилиқлирини бир пәстә ейтип түгитиш мүмкин әмәс. Дегән билән шуни зор мәғрурлиниш илкидә тилға алмақчимәнки, һазирқи вақитта Қазақстан почтта хизмитидә 22 миң адәм хизмәт қилиду, пүткүл мәмликәт даирисидә 3200дин ошуқ бөлүмчә, 14 вилайәтлик шөбә бар. Әнди бүгүнки күндики «Қазпочта» хизмитиниң мүмкинчиликлири тоғрилиқ гәп қозғисиңиз... Почтилиқ хизмәт көрситишниң мобильлиқ усуллири, арилиқ хизмәт көрситиш, несийә төләш, «Сәлем теңге», «Western unіon», «Юнистрим» охшаш ахча авдуруш, барлиқ селиқ вә коммуналлиқ төләмләрни әмәлгә ашуруш хизмити бар. Бүгүн пенсионерлар билән бюджет системисиниң ишчи-химәтчилири пенсия билән маашини «Қазпочта» карточкиси арқилиқ алиду. Йошурушниң һаҗити йоқки, йеза хәлқи көпинчә шәһәрләргә яки жирақ тәвәләргә ахча йәткүзүштә йолувчиларниң ярдимигә тайинип кәлмәктә. Һазир уларниң «Қазпочта» арқилиқ икки минутниң ичидила Қазақстанниң һәрқандақ йеригә ахча авдуруш имканийити бар. Шундақла жүргүзгүчиләр «Қазпочтиниң» барлиқ бөлүмчисидин йол жүрүш қаидилирини бузғанлиғи үчүн җәриманиниң бар-йоқлуғи һәққидә әхбарат елифвиа вә төмүр йол билетлирини елиш, «Хоум Кредит Банк», «Казком», «ЖилстройСбербанк» арқилиқ депозит ечиш, «Хоум Кредит Банк», «Альфа Банктин» несийә елиш, телефонға пул қачилаш охшаш хизмәт түрлириму бизниң җәмийәт арқилиқ әмәлгә ашурулиду. — Уйғур наһийәсидә херидарлириңларни қизиқтурғидәк почта хизмитигә аит йеңилиқлар барму? Жуқурида атап ейтқан хизмәтләрниң барлиғи Уйғур наһийәлик «Қазпочта» шөбисидиму қолға елинған. 2008-жилдин 2010-жилғичә, икки жил арилиғида наһийәмиздики Сүмбә, Ақтам, Кәтмән, Шуңқар, Чарин, Таштиқарису йезилирида йеңи почта беналири қәд көтәрди. Буниң өзи наһийә хәлқи үчүн чоң бир утуқ әмәсму? Тәвәмиздә 16 почта бөлүмчиси бар, уларниң он төртидә постерминал қоюлған. Келәчәктә йеза-йезилардики почта имарәтлири заманға тәливигә лайиқлаштурулиду, дәп ишинимиз һәм шуниң ғемини қиливатимиз. Көрүп турғиниңиздәк, һазир Чонҗа йезисидики «Қазпочта» идарисигә җөндәш ишлири жүргүзүлмәктә. У аяқлашса, «Супермаркет посылок» хизмити ишқа қошулиду. Бу хизмәтниң өзгичилиги шуки, турғунларниң намиға әвәтилгән посылка һәққидә уларниң янфониға учур әвәтилип, кейин улар почта арқилиқ кәлгән посылкисини бемалал елиш имканийитигә егә болиду. Бурунқидәк новәттә турмайду, почта хадимлириниму беарам қилмайду дегән сөз. Хуш қилидиған йәнә бир йеңилиқ, пат-йеқинда наһийәлик «Қазпочта» бенасиниң сиртиға тәвлүк бойи ишләйдиған банкомат орнитилиду. — Өзиңиз рәһбәрлик қиливатқан шөбидики коллектив һәққидә немә ейтариңиз бар? Бүгүнки заманда чоң җавапкәрликни тәләп қилидиған саһада хизмәт қиливатқан почта хадимлириниң әмгиги бебаһа дәп билимән. «Қазпочта» АҖниң Уйғур наһийәлик шөбисидә һазир 90гә йеқин адәм ишләйду. Уларниң йеримини әң еғир мәйдандики «җәңчилиримиз» –почтальонлар тәшкил қилиду. — Бәхитҗан Турсун оғли аилиңиз һәққидә билишкә боламду? — Өмүрлүк җүптүм Саһидәм Нурдунова малийә хадими. Үч пәрзәндимиз, икки нәвримиз бар. Чоң оғлумиз Бәхтишат — тиҗарәтчи, Бәхтияр аписи иккимизниң изида маңди. Қизимиз мәктәптә оқуйду. — Сөһбитиңизгә рәхмәт. Сизгә мустәһкәм саламәтлик вә иҗадий утуқ тиләймиз.