• Баш муһәррир минбири
  • 19 Қазан, 2017

Жиллап жиққан аброюмизни  бир күндила төкүвалмайли

Ершат ӘСМӘТОВ, “Уйғур авази”/ «Уйғур авазиниң» заман тәливигә лайиқ, мәзмунлуқ нәширләрдин болуп шәкиллинишидә, биринчи новәттә, мәшәқәтлик иҗадий меһнәт егилири — гезит хадимлири билән турақлиқ муәллиплиримизниң әмгиги бебаһа. Шундақла уларни маддий һәм мәнивий җәһәттин қоллап-қувәтләп келиватқан сахавәтлик инсанлиримизму алқиш-һөрмәткә мунасип.  Гезитимизниң һәрхил жилларда чиққан санлирини варақлап көрсәк, алимлиримизни вә язғучи-шаирлиримизни һесаплимиғанда, йүзлигән әмгәк мәрданилирини, ишбиләрмәнләр билән тиҗарәтчиләрни кәң аммиға тонуштуруптимиз. Журналистларниң шәрәплик хизмити түпәйли улар пәқәт көпчиликкә тонулупла қалмай, шуниң билән биллә шан-шөһрәт қазинип, иззәт-еһтирамға еришипту. Әйнә шундақ әзимәтлиримизниң көпчилиги редакциямизгә келип яки телефон арқилиқ бизгә чәксиз миннәтдарлиғини билдүриду. Журналистниң әмгигини баһалайдиған, қәдир-қиммитини чүшинидиған әйнә шундақ алий пәзиләтлик инсанларға рәхмәттин башқа ейтаримиз йоқ. Амма, бәхиткә қарши, «янчуғи дөң» айрим достлиримиз пат-пат гезитқа чиқмиса, «ағрип қалидиған» һаләткә йетиду. Йәни «юлтузлар» кесилигә муптила болуп, өзини аләмгә тонутқан миллий нәширгә, униңда хизмәт қилидиған қәләм саһиблириға тәшәккүр ейтиш бу яқта турсун, саламлишиштин қалиду. Худди биз уни йезишқа миннәтликтәк, журналистларни мал орнида көридиғанларму бар техи. Иш җәриянида ундақларниң талийини көрүп, «өз орниға» қоюпму жүримиз. Буниңдин бираз вақит илгири исми көпчиликкә мәлум, инавәтлик, сахавәтлик инсанлиримизниң бириниң йеқини редакциягә телефон қилип: «Акимизни гезитқа чиқирип қоюш керәк. Әҗайип мақалә йезип әвәтивәттуқ. Қисқартмай, өзгәртмәй, елан қиларсиләр» деди буйруқвазлиқ билән. Ойлап көрсәк, биринчидин, гәп болуватқан тәдбирчан қериндишимизниң һаятиға мунасивәтлик һечқачан бир муһим вақиә йүз бәрмигән. Иккинчидин, бу шәхс гезитимизға биринчи қетим чиқиватмайду. Мәсилиниң мошу тәрәплирини чүшәндүргинимдә, сөһбәтдишим хапа болуп: «Бу мақалини биз акимизниң көңлини көтирип қояйли, дегән нийәттә әвәтиведуқ. Униң силәргә қилған яхшилиғини унтуп қалдиңларму немә? Байқаңлар, йәнә уни рәнҗитип қоймаңлар!» дәп попуза қилишқа өтти. Шундиму зиддийәткә бармаслиқ нийитидә өзәмни қолумға елип: «Бизгә өз вақтида һамийлиқ қилған акимизниң һиммитигә рәхмәт, әлвәттә. Амма бу қетим униң тоғрилиқ мақалә беришниң һечбир зөрүрийити йоқ. Тәвәллуди болғанда бу сахавәтлик инсанниң нәмунилик ишлирини әсләп, кәңирәк язармиз...» дәп җавап бәрдим. Телефон қилған жигит гепимни ахирини тиңшимай ногәйни қоювәтти... Мана, иш җәриянида биздә мошундақ йеқимсиз әһваллар пат-пат йүз берип туриду. Раст, биз жуқурида тәкитлигән қериндишимизниң елимиз, миллитимиз мәнпийитидә қилған әмгәк-әҗрини унтумаймиз.Униң үчүн у мунасип мукапитиниму, алқишиниму алди. Амма қилған яхшилиғини миннәт қилиши шәрт әмәсқу! Һазир елимизниң җай-җайлирида һамийларниң қоллап-қувәтлиши билән йүзлигән чарә-тәдбирләр, хәйрихаһлиқ ишлар уюштурулуватиду. Бу илгириму болған, кәлгүсидиму давамлишиду. Мәсилән, Қазақстан меценатлар клуби тәсис қилған «Тарлан» мукапити узун жиллардин бери елимиздики өз саһасида муваппәқийәт қазинип кәлгән иҗадийәт адәмлиригә тапшурулуп кәлди. Бир қизиғи, мукапатлиқ фонди 120 миң АҚШ доллирини тәшкил қилған клуб әзалириниң кимләр екәнлигини һечким билмәйду. 2012-жилдин буян һәр жили өткүзүлүп келиватқан җумһурийәтлик «Қазақстан барысы» турнириниң (баш мукапат — 150 миң АҚШ доллири!) һамийлириниң исимлири һеч йәрдә аталмайду... Мундақ мисалларни йәниму кәлтүрүшимиз мүмкин. Шуни тоғра чүшиниңларки, һөрмәтлик қәлби сехи, мәрт-мәрданә меценатлиримиз, биз силәрниң сахавәтлик ишлириңларни һечқачан унтумаймиз. Бизгә ярдәм қолуңларни сунушни тохтатсаңларму, әл-жутқа қилған нәмунилик паалийитиңларни гезит бетидә йорутуп, исмиңларни кәң аммиға тәрғип қилиштин баш тартмаймиз. Пәқәт мәнмәнчилик, шөһрәтпәрәслик чаңгилиға чүшүп қелип, жиллар давамида мисқаллап жиққан аброй-шәниңларни йоқитип қоймисаңлар болғини.

313 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы