• Әхбаратлар еқими
• 16 Қараша, 2017

Мәшрәптә яхши гәпму, алар нәпму болди

Елимиз Президенти Нурсултан Әбиш оғли Назарбаевниң «Келәчәккә нишан: мәнивий йеңилиниш» мақалисида қазақстанлиқларниң миллий урпи-адәтлирини сақлишиғиму алаһидә көңүл бөлгән. «Заман еқимидин йоқимай кәлгән урпи-адәтлиримизни техиму җанландурушимиз һаҗәт. Мәнивий йеңилиниш кона урпи-адәтлиримиздин нәп алмиса, адишиду», дәп язиду Дөләт рәһбири өз мақалисида. Йеқинда Қорам йезисида тунҗа қетим өткән Яшлар мәшривидә нәқ мошу мавзу әтрапида әтраплиқ гәп болди. Мәшрәп рәсим-қаидиләргә риайә қилған һалда башлинип, дәсләп Дөләт рәһбириниң «Келәчәккә нишан: мәнивий йеңилиниш» мақалиси һәққидә қисқичә доклад оқулди. У күни сөзгә чиққан Қорам йезисиниң жигитбеши Қурванҗан Исламов, Әмгәкчиқазақ наһийәлик Уйғур этномәдәнийәт мәркизиниң Қорам йезилиқ шөбисиниң рәиси, мәшрәп беги Адилҗан Мәсимов, рәссам Диас Қурбанов, шаир Әкрәм Садиров Президентниң мақалисиға, миллий мәшрәпниң әһмийитигә тәпсилий тохталди. Шуниңдин кейин новәт оюн-тамашиға берилди. Алмутидин алаһидә тәклип қилинған риясәтчиләр: Сухраб Давутов билән Данияр Қунахунов өзлириниң өткүр һәзил-чақчақлири арқилиқ көпчиликни күлкигә ғәриқ қилса, «Пәрванә» ансамбли билән Мехрат Рәхмәтҗан орунлиған хәлиқ нахшилири мәшрәпниң мәзмунини техиму бейитти. Шундақла жут мөтивәри Исрайил атиниң «Сапай уссули», Абдуманап Махмутҗанниң «Долан уссули», хәлиқ таланти Нурәхмәт Исрайиловниң йеқимлиқ нахшилири тәшна көңүлләргә арамбәхш дәмләрни һәдийә қилди. Ахирида мәшрәп иштракчилири ушбу сорунни уюштурған Шөһрәт Әйса рәһбәрлигидики оттуз оғул әһлигә өзлириниң миннәтдарлиғини билдүрди. Абдулҗан АЗНИБАҚИЕВ.