• Бизниң җанкөйәрлиримиз
• 16 Қараша, 2017

Хизмитигә яриша иззити бар

Алмутидики уйғурлар зич орулашқан “Қалқаман-2” микрорайонини шәһәрликләр «йеңи мәһәллә» дәпму атайду. Лекин шундақ атап жүрүп, униң қурулғиниға бийил топ-тоғра 20 жил бопту. Биз, уйғурлар, әзәлдинла көчүп барған йеримиздә асасән жут болуп яшашни ойлаймиз. Бу мәһәллиниң дәсләпки турғунлири асасән Панфилов, Уйғур, Әмгәкчиқазақ наһийәлиридин көчүп кәлгәнләр . Әйнә шулар жутниң дәсләпки қозуғини қаққанлар болуп һесаплиниду. Жутта дәсләп икки коча пәйда болди. Әйнә шу кочиларниң турғунлири өз ичидин миллий ғурури үстүн Алимжан Давутовни коча жигитбеши қилип сайлайду. Мана 17 жил бойи өзигә жүкләнгән ишни чоң жавапкәрлик билән ада қилип келиватқан акимиз бүгүнки күндә 60 яшлиғини қарши алмақта. Алимжан Турған оғли Давутов Вәтинимизниң Қорғас наһийәсигә қарашлиқ Дашигүр йезисида дунияға кәлгән. 1959-жили, тәғдир тәқәзаси түпәйли, ата-аниси билән Яркәнт тәвәсидики Пәнҗим йезисиға көчүп келиду. Мәһәллидики оттура мәктәпни утуқлуқ тамамлап, Ташкәнт шәһиридики йеза егилиги техникумиға оқушқа чүшиду. Арилиқта, йәни 1976 — 1978-жиллири, һәрбий хизмитини ада қилип қайтиду. 1980-жили оқушини муваппәқийәтлик тамамлап, Яркәнт шәһиридики йеза егилиги техникилирини ремонтлаш станциясигә механик болуп ишқа орунлишиду. Бу йәрдә Алимҗан Давутов өзини ишини пухта билидиған йетүк мутәхәссис сүпитидә көрситиду. Өткән әсирниң 90-жиллириниң башлирида елимиздә овҗ алған ихтисадий боһран дәвридә Алимҗан ака аилиси билән Алмутиға көчүп келиду. Бу йәрдә улар шу пәйттә шәһәрниң әтрапиға җайлашқан Қалқаман мәһәллисигә орунлишиду. Йеңи мәһәллидики жутдашлири арисида очуқ вә дурус пикир қилип көзгә чүшкән Алимҗан Давутовни дәсләп пәйда болған Жетысу вә Қосынов кочилириниң жигитбеши қилип сайлайду. Алимҗан ака аз вақит ичидила хелә тилға аларлиқ ишларни әмәлгә ашуриду. Бу кочилардики той-төкүн, нәзир-чирақ ишлири бирдин рәткә чүшиду. Жигитбешиниң уюштуруши билән мошу мәрасимлар үчүн кочиниң өз алдиға орундуқ-үстәллири ясалди, қача-қомучлири сетивелинди. Яшларни спортқа җәлип қилиш мәхситидә, жуттики җанкөйәрләр билән бирлишип, спорт мәйданчисини бәрпа қилди. Шундақла яшларниң футбол командиси қурулди. Уларға охшаш спорт кийими елинип, балилар шәһәр миқиясидики айрим мусабиқиләргә иштрак қилди. Бу ейтишқа асан болғини билән, әмәлиятта пәқәт жут ғемида пәрванә болуп жүридиған ирадилик инсанларниң қолидинла келидиған иш. – Бизниң мәһәллимиздә башқа коча жигитбашлири пәқәтла бир кочини башқурса, Алимҗан ака баштинла икки кочиға мәсъул болуп келиватиду. Буларниң башқа кочилардин өзгичилиги, улар өз алдиға фонд қурған. Өз кочилиридила әмәс, бәлки пүткүл мәһәллимиздики ярдәмгә муһтаҗ, турмуши төвән аилиләргә мана мошу фондтики мәбләғ һесавиға маддий ярдәм көрситип кәлди. Шундақла кочилириға свет, су киргүзүш һәм «Уйғур авази» гезитигә йезилиш, театр абонементлирини сетиш охшаш ишларға Алимҗан ака көп күч чиқарди, – дәйду сөзара «Қалқаман-2» микрорайониниң чоң жигитбеши Йүсүпҗан Турдимәмәтов. – Йошурушниң һаҗити йоқки, йеңидин бәрпа болуп, әндила «путиға туруватқан» жутта иш елип бармақ башта йеник болмиди, – дәйду Алимҗан ака. – Шу жиллири йеңи мәһәллидә свет, су, йол мәсилилирини һәл қилиш үчүн бираз жүгрәшкә тоғра кәлди. Хошна Достлуқ мәһәллиси билән бизни қошуп туридиған көрүкниму дайим су елип кетидиған. Рәмәтлик Әбәйдуллам һаҗим Босақов ақсақилимиз билән бирликтә турғунлардин пул жиғип, көрүкни, андин чоң кочимизни җөндәттуқ. Пәқәт мәһәллимиздә өйләр зич селинғандин кейинла, наһийәлик һакимийәт көрүк билән йолларни җөндәш вәзиписини өз зиммисигә алди. Һазир жутимиз тониғусиз дәриҗидә өзгирип кәлмәктә. Телефон, свет, газ билән толуқ тәминләнгән һәр кочиға асфальт селинип, таң атқичә чирақлар йенип туриду. Көп жиллар мабайнида ичимлик су чоң муәмма болған болса, бүгүнки күндә турғунлар униңғиму қол йәткүзди. Милләтпәрвәр инсан Алимҗан Давутов өз кочилиридики 70 аилини сөйүмлүк гезитимиз «Уйғур авазиға» йезилишқа дәвәт қилди. Қалқаманда Давутовлар аилиси жутдашлар арисида чоң һөрмәт-еһтирамға егә. Рәпиқиси Ризвангүл һәдә Алимҗан акиниң барлиқ ишлирида биринчи қоллап-қувәтлигүчиси һәм ярдәмчиси. Йеқинда у мәһәллә Ханим-қизлар кеңиши рәисиниң орунбасари болуп сайланди. Алимҗан ака Давутов бийил жигитбеши хизмитидики һәммә ишни рәткә селип, жут тизгигини яшларға тапшуруп бәрди. Уни жут-җамаәтчилик мошу микрорайондики «Норуз» мәшривиниң жигитбеши қилип сайлиди. Өзиниң әмгәкчанлиғи, милләтпәрвәрлиги билән жут һөрмитигә сазавәр болған акимизни 60 яшлиқ тавәллуди билән жутдашлири намидин қизғин тәбрикләп, аилисигә хатирҗәмлик, тениға мустәһкәм саламәтлик тиләймиз. Зулияр САБИРОВ.