• Әхбаратлар еқими
• 16 Қараша, 2017

Ғәйрәт — «Әҗдатлар изи» бар «Иссиқ макан»

Алмута шәһириниң Горный-Гигант мәһәллисидә Нурамбәг Баратов исимлиқ жутдишимиз истиқамәт қилиду. Бу кишини «жутдишимиз» дәп ишәшлик ейтишимниң сәвәви, униң дадисиниң теги-тәти ғәйрәтлик екән. Мән буни мошу йеқинда йоруқ көргән «Әҗдатлар изи», «Иссиқ макан» намлиқ икки әслимиләр топлими арқилиқ билдим. Нурамбәг ака Баратов «Лапчилар бәс-бәстә», «Мән зади...» намлиқ китапларниң муәллипи. Билидиғиним, у шуниң билән биллә наһайити китапхумар адәм. Униң уйғур язғучи-шаирлириниң тарихий роман-повестьлирини, шеирий топламлирини сақлайдиғанлиғидинму хәвирим бар. Йеқинда Нурамбәг ака жутумизға қәдәм тәшрип қилип, өзиниң йеңи топламлири билән биллә өйидә сарғийип ятқан китаплирини мәктәп китапханисиға тапшурди. – Ғәйрәт — мениң әҗдатлиримниң изи қалған иссиқ жут, — деди Нурамбәг ака муәллимләр билән болған учришишта. — Топламлиримда жутдашлирим билмәйдиған бәзи фактлар болуши мүмкин. Жут һәққидә аңлиған-көргәнлиримни әслимә ретидә топлап чиқтим. Шундақла мәктәпкә миллий әдәбиятимиз тарихида мунасип орни бар язғучи-шаирлиримизниң китаплириниму елип кәлдим. Йошуридиғини йоқки, һазир бәзи яшлар китап оқумайду. Шуңлашқиму оқуғучиларниң китапқа дегән муһәббитини ойғитиш керәк. Орунлуқ пикир. Жутни қәдирләш бөләк, һә, өтмүшни билиш – пәриз. Нурамбәг ака әкәлгән китаплар арисида мәшһур намайәндиләр Зия Сәмәди, Һезмәт Абдуллин, Җамалидин Босақов, Абдукерим Ғәниев кәби әдипләрниң әсәрлири бар. Акимиз уларни көзиниң қаричуғидәк сақлапту. Әнди униң бу нәмунилик ишини давамлаштуруш яш әвлатниң қолида. Абдулҗан АЗНИБАҚИЕВ.Әмгәкчиқазақ наһийәси.