• Әхбаратлар еқими
• 16 Қараша, 2017

Президент Қостанай вилайитидә болди

Өткән һәптидә Қазақстан Җумһурийитиниң Президенти Н.Назарбаев Қостанай вилайитидә иш бабидики сәпәрдә болди. Сәпәр даирисидә Дөләт рәһбири вилайәт мәркизидики санаәт вә иҗтимаий объектларни арилиди  һәм региондики инвесторлар билән учрашти. Президент дәсләп «Әуежай» микрорайонидики «Нұрлы жер» дөләт программиси даирисидә әмәлгә ашурулуватқан ишлар билән тонушти. Микрорайонда иҗтимаий инфрақурулум объектлириму селинмақта, шуларниң қатарида 900 орунлуқ мәктәп, дөләт шәхсий һәмкарлиқ даирисидә спорт вә дәм елиш комплекси селиниватиду. 28 орунлуқ икки бала бағчиси, спорт мәйданчилири, дәм алидиған җай қәд көтәрмәкчи. Шуниңдин кейин Нурсултан Назарбаев «СарыарқаАвтоПром» машина ясаш заводиға келип, автомобиль санаити билән шуғуллиниватқан карханиниң иши билән тонушти. Қазақстан Президентиға Қостанайда чиқириливатқан JAC, Peugeot, Ravon брендлириниң автомобильлири, JAC электромобильлири, шундақла Ивеко базисидики мәктәп автобуслири көрситилди. Заводта бийил он ай ичидә төрт миң автомобиль чиқирилған. Вилайәт һакими Архимед Мухамбетов Дөләт рәһбиригә регионниң ихтисадий-иҗтимаий тәрәққияти һәққидә әхбарат бәрди. Вилайәттә санаәтму, йеза егилигиму тәрәққий етиватиду. Һаким инвестиция җәлип қилиш вә чоң инвестициялик лайиһиләрниң әмәлгә ашуруш мәсилисигиму кәң тохталди. Дөләт рәһбири Қостанай вилайити елимизниң йеза егилиги тәрәққий әткән, сүпәтлик экспортқа чиқирилидиған ашлиқ өстүридиған вилайәт екәнлигини, һава райиниң бийилқидәк қолайсизлиғиға қаримай, 5 миллион тонна ашлиқ жиққанлиғини алаһидә тәкитлиди. Чүштин кейин Нурсултан Назарбаев йеқинда ечилған Kostanay PLAZA аиләвий дәм елиш – сода мәркизини зиярәт қилди. Әмәлгә ашурулған ишлар һәққидә һесават берилди Президент Нурсултан Назарбаев «Самұрық-Қазына» акционерлиқ җәмийити башқармисиниң рәиси Өмирзақ Шөкеевни қобул қилди. Учришишта Дөләт рәһбиригә «Самұрық-Қазына» акционерлиқ җәмийитиниң бийил он айдики ишиниң нәтиҗилири бойичә һесават берилди. Өмирзақ Шөкеевниң бәргән әхбаритиға мувапиқ, компанияниң кирими бултуқи көрсәткүч билән селиштурғанда, 44 пайизға өсүп, 414 миллиард тәңгини тәшкил қилған. Шуниң билән биллә «Самұрық-Қазына» акционерлиқ җәмийити башқармисиниң рәиси Қазақстан Президентиға холдинг тәркивидики компанияләр саниниң қисқириғанлиғи вә карханини башқуруш дәриҗисини йүксәлдүрүш бойичә һесават бәрди. Өмирзақ Шөкеевниң мәлуматлири бойичә, мошу жилниң ахириғичә холдинг тәркивидики компанияләр сани 315кә қисқирап, башқуруш дәриҗиси 4 басқучқа азийиду. Президент учришиш ахирида бирқатар ениқ тапшурмиларни бәрди.