• Йеңилиқлар
• 16 Қараша, 2017

Регионларара һәмкарлиқниң истиқбали зор

Өткән һәптидә Дөләт рәһбири Нурсултан Назарбаев Россияниң Челябинск шәһиридә өткән XIV регионларара һәмкарлиқ форумиға қатнашти. Форум һарписида Қазақстан Президенти Нурсултан Назарбаев Россия Федерациясиниң Президенти Владимир Путин билән учрашти. Дөләт рәһбәрлири учришиш давамида иккитәрәплимә һәмкарлиқниң муһим мәсилилирини, уни техиму тәрәққий әткүзүш истиқбалини муһакимә қилди. Учришишта Президентлар бирқатар иккитәрәплимә һәмкарлиқ мәсилилирини муһакимә қилип, күн тәртивидики хәлиқара мәсилиләргиму тохталди. «Бизниң регионларара һәмкарлиғимиз – тосалғуларға қаримай, илгириләп келиватқан ихтисадий мунасивәтлиримизниң асаси. Ахирқи тоққуз айда дөләтлиримиз арисидики товар айлиними 31 пайизға өсти. Бизниң һәрбир учришишимиз – йеңи утуқ. Униңда кәңдаирилик вәзипиләр һәл қилиниду. Бүгүнки учришишму дөләтләр арисидики һәмкарлиқни тәрәққий әткүзүш үчүн муһим роль атқуриду», деди Қазақстан Президенти. Икки Дөләт рәһбири кәчқурунлуғи форумниң нәтиҗилири чиқирилған мәҗлискә қатнишип, униң иккитәрәплимә мунасивәтләрниң муһим бөлүгигә айланғанлиғини вә Қазақстан билән Россия арисидики һәмкарлиқниң көрүги болуватқанлиғини тәкитлиди. «Бизниң дөләтлиримиз достлуқ, хошнидарчилиқ, тәңһоқуқлуқ вә өзара һөрмәт қаидилири асасида тәрәққий етиватиду. Һәмкарлиқниң буниңдин кейинму барлиқ саһаларда күчәйтилидиғанлиғиға вә шараит яритилидиғанлиғиға ишәнчим камил», деди өз новитидә Россия Президенти Владимир Путин. Форум даирисидә алий оқуш орунлири ректорлириниң учришишлириму уюштурулди. Униңға Қазақстанниң Билим вә пән министри һәм алий оқуш орунлириниң ректорлири қатнашти. Форумниң иккинчи күни рәқәмләндүрүш мәсилисигә беғишланған жиғинға елимизниң Әхбарат вә коммуникацияләр министри башлиған бир топ делегацияләр қатнишип, кәсипдашлар билән саһаға мунасивәтлик муһим йөнилишләрни муһакимә қилди. Умумән, форумға барлиқ вилайәтләрниң һакимлири, министрлар қатнишип, регионларара бирқатар шәртнамиләргә имзаланди. Икки дөләт рәһбәрлири Қазақстан вә Россия арисидики дипломатиялик мунасивәтләрниң 25 жиллиғиға даир Бирләшкән мураҗиәт қобул қилди. Шундақ қилип, регионларара һәмкарлиқ нәтиҗисидә һөкүмәтара сәккиз шәртнамигә, регионларара оттуз һөҗҗәткә қол қоюлди.