• Әхбаратлар еқими
• 23 Қараша, 2017

Чақниңму чатиғи бар

ҺОШИЯР БОЛУҢ!/ Мәшүр САСИҚОВ, «Уйғур авази»/ Мәлумки, қиш йеқинлашқансири автомобиль жүргүзгүчилири «төмүр тулпарлириниң» язлиқ чақлирини авуштурушқа алдирайду. Әнди Алмутидики машинилар саниниң күн санап өсүватқанлиғини нәзәрдә тутсақ, бу хизмәт түрини көрситиш орунлири уларниң хиҗалитидин чиқип үлгирәлмәйватқанлиғи ениқ.Мана мошу пурсәтни қолдин бәрмәскә тиришқан айрим «әқилликләр», биркүнлүк шиномонтаж хизмитини ечип, пул тепишниң асан йолини тепивалди. Әлвәттә, улар херидарларға көрситиватқан хизмитиниң сүпити үчүн җавап бәрмәйду. Шуңлашқа йәрлик һакимийәт органлири жүргүзгүчиләрни мундақ иш-паалийити гуманлиқ ишханиларда чақ авуштурмаслиққа чақириватиду. Һәрқандақ шиномонтаж хизмитидин пайдиланғанда, чоқум улардин фискал чәклирини тәләп қилиш керәклиги һәққидиму әскәртишләр бериливатиду. Ундақ болмиған әһвалда, бирәр вақиә йүз бәрсә, уни испатлаш қийинға чүшидиғанлиғи агаһландурулуп, бу тоғрисида дөләтлик кирим органлириға иҗтимаий торлар арқилиқ хәвәрләш тәвсийә қилиниватиду. «Биркүнлүк» дәп нам алған шиномонтаж ишханисидикиләр, болупму техникидин унчивала хәвири йоқ жүргүзгүчиләрни, болупму ханим-қизларни алдап бейиватиду десәк, ашурувәткәнлик әмәс. Чүнки улар аҗизларға «чала» хизмәт көрситип, көп пул алғинини аз дегәндәк, йеңи резинилирини кониға алмаштурувалидиған әһвалларму йүз бәрмәктә. Буниңдин ташқири, рәсмий мәлуматларға қариғанда, Алмутида мошу хизмәт түри билән шуғуллинидиған 1845 тиҗарәтчи тиркәлгән болсиму, уларниң 976си өткән жилниң селиғини һеликәм төлимигән. Икки күн илгири Алмутида дәсләпки қар йеғиведи, шиномонтаж орунлириға йеқин келиш әсла мүмкин болмиди. “Бүгүн-әтә” билән вақитни өткүзүп қойғанлар, худди шәһәр кочилири муз мәйданиға айлинип кәткәндәк, вулканизацияләрни бесивалди. Һә, биз сөз қиливатқан асан йол билән пул тепишниң кәйнигә киргәнләр мундақ пурсәтни қолдин бәрсунму? Яқ. Улар бир дәқиқиму теч ятмайватиду. Ахирида ейтаримиз, «биркүнлүк» намға егә ялғанчи шиномонтажчиларниң алдам халтисиға чүшүп қелиштин сақлиниңлар, һөрмәтлик жүргүзгүчиләр!