• Мөтивәрләр
• 23 Қараша, 2017

«Тельман дохтурни тонамсиз?..»

КӘСИПКӘ САДАҚӘТЛИК/ Гөһәрбүви Исмайилҗанова, “Уйғур авази”/  Хизмитимгә бола, адәмләр билән нурғун учришимән. Улар өзлириниң ой, пикир-тәклиплири билән ортақлишиду. Бурунқи иш паалийитидин, һаятидики кәчмишлири һәққидә әслимә, һекайилирини ейтип бериду. Уларниң асасий қисми өз вақтида маарип, саламәтликни сақлаш саһалирида яки илгәрки колхоз-совхозларда үнүмлүк ишләп, һазир һөрмәтлик дәм елишта жүргән салаһийәтлик мутәхәссисләр, һазир жут қәдирлигән мөтивәрләр. Өткәндә Панфилов наһийәсиниң Пәхрий граждини Тельман ака Абдусемәтов билән учришип қалдим. У наһийәлик почтиға берип, «Уйғур авази» вә «Яркәнт тәвәси» гезитлириға муштири болғанлиғини ейтти. Тельман Зияр оғлини көптин бери яхши билимән. Наһийәдики терә ағриқлири диспансерида ишләп, һөрмәтлик дәм елишқа чиққандин кейинму, мәзкүр саһада, наһийә рәһбәрлигиниң илтимас-тәкливигә бола, 73 йешиғичә хизмәт қилғанлиғидин хәвирим бар еди. Шу чағларда баш врачниң терә ағриқлири, уни давалаш йоллири һәққидә мақалилири гезит бәтлиридә пат-пат берилип туратти. Студентлиқ дәвримдә қолумға тәмрәткә охшаш бир яра пәйда болуп, униң қобулханисида болғанлиғим ядимға кәлди. Шу чағда униң: «Есиңизда болсун, һәрқандақ терә ағриғиға муптила болғичә униңға алдини елиш әвзәл. Терә ағриқлири билән ағриған адәм сәллимаза сақийип кәтмәйду. Биз, мутәхәссисләр, пәқәт уни давалаймиз», дегән еди. Мән өткән вақиәни униң есиға салдим. Тельман ака йәнә шу сөзидин қайтмиди. Иккимиз қизғин сөһбәткә чүшүп кәттуқ. Мән йерим әсир һаятини медицина саһасиға беғишлиған Тельман акиниң өмүрбаяниғиму қизиқтим. Учисиға сим-костюм кийип, бешидин шляписи чүшмәйдиған, дайим җиддий қияпәттә жүридиған гәп-сөзлири чос, бирақ орунлуқ һәм салмақлиқ Тельман Зияр оғли мураҗиәт қилған соаллиримниң һәммисигә алдиримай җавап бәрди. Хәлқимизниң шанлиқ пәрзәнди «Уйғур балиси» — Нәзәрғожа Абдусемәтовниң җийәнлири Зияр билән Рәпиқ өз дәвриниң зиялилиридин еди. Зияр Абдусемәтов өз һаятини мәрипәткә беғишлап, бала тәрбийиләштәк шәрәплик саһада хизмәт қилған еди. Рәпиқ болса, медицина саһасини таллавалди. Тельман ака әшу Зияр муәллимниң 14 пәрзәндиниң қошгезәклириниң бири. Кичик дадиси Рәпиқниң тәсири болса керәк, дохтурлуқ кәспигә болған қизиқишиниң үстүн болғанлиғини йошурмайду. У Чулуқайдики йәттә жиллиқ, андин шәһәрдики Молотов (һазирқи И.Алтынсарин) намидики мәктәпләрни тамамлап, дәсләп Алмутидики җумһурийәтлик медицина училищесида билим алди. Әмгәк паалийитини Қизилорда вилайитиниң Жаңақорған наһийәлик ағриқханисида башлиди. Арида үч жил армия сепигә чақиртилип, Свердловск шәһиридә һәрбий фельдшер болуп хизмәт қилди. Үч-төрт жил ишлигән яш мутәхәссис нәзәрийәвий билимини мукәммәлләштүрүш керәклигини чүшинидудә, Шәмәй шәһиридики медицина институтиға оқушқа чүшиду. У йәрдә кичик дадиси Рәпиқ оқутқучи болуп ишләтти. Гезиги мәрһум Марсму жуқарқи курста оқуватқачқа, уларниң тәсири көп болди. Оқушқа дегән интилиши жуқури болуп, алтә жил тинимсиз, иҗадий издинип оқуди. Алий билим орнини муваппәқийәтлик тамамлап, үч жил Талдиқорған вилайәтлик терә ағриқлири диспансерида баш врач болди. 1971-жили ана жутиға келип, Панфилов наһийәлик терә ағриқлири диспансериға ишқа орунлишиду. Кәспигә болған садақити түпәйли утуқ қазанди, кәсипдашлириниң ишәнчисини ақлиди, аддий врачтин, баш врач дәриҗисигичә йәтти. Тельман Абдусемәтов, биз башта тәкитлигинимиздәк, һөрмәтлик дәм елишқа чиқип, йәнә он жил мәзкүр диспансерда ишләп, сөйүмлүк ишини оғли Дилмуратқа өткүзүп бәрди. Ейтмақчи, бу аилини яркәнтликләр «дохтурлар сулалиси» дәпму атишиду. Тельман ака рәпиқиси Маһинур һәдә билән икки оғул, бир қиз тәрбийиләп, қатарға қошти. Оғуллири Адилҗан билән Дилмурат алий билимлик терапевт. Қизи Гүлнарәм һәмширә. Тельман Абдусемәтов дәм елишта жүрсиму, уни өйигә издәп келиватқан бемарлар аз әмәс. Өз саһасиниң йетүк мутәхәссиси, салаһийәтлик дохтур қолидин келишичә бемарларниң көңлидин чиқишқа тиришиду. Униң йеши сәксәнгә кәлсиму, сөйүмлүк саһасидин қол үзәлмәйватиду. Уни издәп жүргәнләрни күндә дегидәк учритимән. «Тельман дохтурни тонамсиз?» дәйду улар. Уни мәнла әмәс, пүткүл наһийә турғунлири тонуйду... Өз новитидә, жутумизниң қәдирлик мөтивәри Тельман Абдусемәтовни барлиқ гезитханлар намидин 80 яшлиқ тәвәллуди билән қизғин тәбрикләп, униңға мустәһкәм саламәтлик вә аиләвий хатирҗәмлик тиләймиз. Панфилов наһийәси.