• Мөтивәрләр
  • 23 Қараша, 2017

«Балилирим бәхтим һәм тәхтим»

БӘХИТЛИК ҚЕРИЛИҚ/ Сабирәм ӘНВӘРОВА, «Уйғур авази»/ Чонҗа йезисида истиқамәт қилидиған 90 яшлиқ Мерванәм анимизниң иш-һәрикити тимән, зеһни өткүр. Аниниң үзидики қатму-қат қоруқлири, ақ мәхмәлдәк күмүч рәң чачлири, нурға толған көзлири униң өз өмридә аз җапа тартмиғанлиғидин дерәк берип туриду. Течлиқ-аманлиқтин кейин, ақяғлиқлиқ ана сөзини туғулуп өскән аилидин башлиди. У Мәһәмәт вә Патәм Семәтовларниң аилисидә 1927-жили дунияға кәлгән екән. Атиси почта хадими, аниси колхозда сеғинчи болуп ишләпту. Уларниң икки қиз, икки оғли болуп, Мерванәм ана уларниң кәнҗиси екән. М.Семәтованиң балилиқ дәври дәһшәтлик Улуқ Вәтән уруши жиллириға тоғра келип, әндила 14 яшқа толған чеғидин оюнни унтуп, әмгәк билән тавлинипту. Шу жиллири хәлиқ еғир қийинчилиқларға дуч кәлсиму, оқушини давамлаштуриду. Дәристин чиқип, бош вақтини тағу-ташта, етиз қойнида мал беқип, ашлиқ өстирип, шу жиллардики турмуш синақлириға тақабил туриду. Кичигидинла математика пәнигә қизиққан оқуғучини мәктәп мәмурийити мәзкүр пән бойичә мәхсус курсқа әвәтиду. Шундақ қилип, билимини йетилдүрүп кәлгән яш мутәхәссис Уйғур наһийәлик дөләтлик ғәмсизләндүрүш бөлүмигә ишқа қобул қилиниду. Шу йәрдә ишләп жүрүп, 19 йешида өмүрлүк җүпти Мәсут Сабировқа турмушқа чиқиду. Мәсут Сабиров Улуқ Вәтән урушиға баштин-аяқ қатнишип, Берлинғичә бариду. 1945 — 1946-жиллири шу йәрдә бир жил ишләп, туғулған жутиға қайтип келиду. Яшлиғимизда күн көрүш үчүн қолдин кәлгән оқәтниң һәммисини қилишқа тиришаттуқ, — дәп сөзини давамлаштурди ана. – У вақитларда адәмләр оқәтни әмәс, оқәт адәмләрни таллатти. Йолдиши Мәсут Сабиров 30 жил мабайнида почта башлиғи болуп ишлисә, өзи таки һөрмәтлик дәм елишқа чиққичә наһийәлик кинофикация бөлүмидә бухгалтер болуп хизмәт қилиду. Улар төрт пәрзәнт сөйүп, балилирини қанатлиққа қақтурмай, тумшуқлуққа чоқтурмай беқип, қатарға қошиду. Оғуллири – Марат – Қазақтелеком акционерлиқ җәмийитиниң хадими, Мәрип – полиция подполковниги, Махмут – чегара хизмитидә, полковник, қизи Мәрийәм – Өзбәкстанда истиқамәт қилиду. Мән Мерванәм анини издәп барған күни, Мәрийәм һәдә Ташкәнттин анисини йоқлап кәлгән екән. – Бовимиз Мәһәмәт Семәтов билимлик киши болуп, көп тилни мукәммәл биләттекән. У латинчә, әрәпчә йезиқларниму оқаттекән. Шуңлашқа анимизниң билим елишиға көп көңүл бөлүпту. Йәнә шуни алаһидә тәкитләш лазимки, анам яш чеғида хәлиқ нахшилирини бар вуҗуди билән бабиға йәткүзүп ейтқачқа, өз вақтида уни һәтта Уйғур театриға ишқа тәклип қилған екән. Лекин анамниң йешини етиварға алған бовимиз униңға йол қоймапту, – дәп қошумчә қилди Мәрийәм һәдә. — Узақ яшишиңизниң сири немидә? — соридим анимиздин. — Бала-чақамниң дөлитидә мошу яшқа кирдим, — деди ана. — Пәрзәнтлирим һалимдин һәр күни дегидәк хәвәр елип туриду. Ана үчүн буниңдин артуқ бәхит болмиса керәк. Аиләмниң меһир-муһәббитигә бөлинип, қерилиқниң қийинчилиғини сәзмәйватимән. Болупму, оғлум Мәрип билән келиним Майнурәмниң маңа болған ғәмхорлуғи түпәйли, йешим бир йәргә барсиму, саламәтлигим яхши. Иккинчидин, узақ яшашниң сири  – җисманий әмгәк. – Үч баламни қейинанам өзи беқип чоң қилди. Нәврилирини бәк яхши көриду. Мүжәз-хулқи еғир-бесиқ, вападар, дилкәш инсан. Пат-пат һойла-арамға, таза һаваға сәйлигә чиқиду, ишәнсиңиз, һазирниң өзидә қол яғлиқлирини бизгә бәрмәй өзи жуйиду. “Әмгәк ветерани”, “Уруш балилири”, Улуқ Ғалибийәтниң 60, 65, 70 жиллиғи медальлириниң саһиби Мерванәм ана бүгүнки күндә 11 нәврә, 8 чәврә сөйүп, уларниң раһитини көрүватқан бәхитлик инсан. Нәврилириниң барлиғи алий оқуш орунлирини пүтирип, һазир таллиған мутәхәссисликлири бойичә ишләватиду. Бәзилири жуқури лавазимлиқ хизмәтләрдә. — Балилирим бәхтим һәм тәхтим, — деди ана мениң билән хошлишиветип. Һәқиқәтәнму шундақ. Әтималим, бәхитлик қерилиқ дегинимиз мошу болса керәк.

502 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы