• Кичик вә оттура тиҗарәт
• 30 Қараша, 2017

Хәлиқниң «Хошаллиғи»

 Сабирәм ӘНВӘРОВА, «Уйғур авази»/ Чонҗа — Ғалҗат йоли бойида бәәйни кичик бир шәһәрчә һасил қилип, биридин-бири чирайлиқ селинған дәм елиш орунлирида қиш-яз туристларниң айиғи үзүлмәйду. Жирақ-йеқиндин кәлгән туристларниң көпчилиги алди билән Қарадаланиң қойниға орунлашқан Чарин чатқилини, ерәнликни зиярәт қилип, йәттә қәвәт йәрниң астидин чиққан шипалиқ аришаң сулирида чөмүлүп, тағниң салқин һавасидин нәпәс елип қайтиду. Әйнә шундақ хәлиқниң көңлидин чиқиватқан вә «Хошаллиқ» дәп нам алған дәм елиш орни херидарларниң жуқури баһасиға еришип кәлмәктә. Мулазимити жуқури, баһасиниң әрзәнлиги үчүнму һәптиниң қайси күнила бармаң, бу йәр адәмләрдин хали әмәс. Болупму, шәнбә-йәкшәнбә күнлири бош орун тепиш тәс. Униң ғоҗайини Халмурат ака Ибдиминов 33 адәмни турақлиқ иш билән тәминләп кәлмәктә. Уларниң оттура айлиқ мааши һәққи 50 миңдин 120 миң тәңгә әтрапида екән. «Хошаллиқниң» 4 бассейни болуп, уларниң иккиси сиртқа, иккиси бенаниң ичигә орунлашқан. Төрт бассейндики шипалиқ суниң һараритиму һәрхил. Салқини — 35, әң иссиғи 42 градус. Бассейнлардики су вақти-вақтида йеңилинип, тазилинип туриду. Жуқурида ейтип өткинимиздәк, иштрак қилғучиларниң яхши дәм елип қайтиши үчүн көплигән шараитлар яритилған. Балилар үчүн оюн мәйданчиси, бүглүкләр вә һаказилар уларниң хизмитидә. Шундақла һәрхил сәнәләргә бағлиқ зияпәт өткүзгүчиләргә 200 орунлуқ кафе хизмәт қилиду. Қисқиси, «Хошаллиқниң» заман тәливигә мувапиқ җабдуқланған бөлмилири, миллий таамлири херидарларға хошаллиқ һәдийә қилмақта. Биз, йеза хәлқи, тирикчиликниң ғемида дәм елиш тоғрилиқ көп ойлап кәтмәймиз, — дәйду Халмурат ака. — Мән бу дәм елиш орнини жутдашлирим, наһийә турғунлири үчүн ачқан едим. Җапакәш хәлқимниң дәм алғини маңа һөзүр беғишлайду. Амма бизниңкиләр дәм алидиғанға вақит тапалмайду. Балилири тәтилгә чиққанда яки мәйрәм күнлири пайдилинип қалмиса, бош вақти йоқ. Шуңлашқа бизгә көпирәк жирақ-йеқиндин кәлгән меһманларниң хизмитидә болушқа тоғра келиватиду. Хошал болидиғиним, жутдашлиримға иш бар. Әлвәттә, һәрқандақ ишқа баһа беридиған — хәлиқ. «Хошаллиқта» дәм еливатқанларниң кәйпияти қандақ? Мәзкүр соалға җавап елиш үчүн бирнәччә адәмгә мураҗиәт қилдуқ.  Бейбитгүл ЖУМАДИЛОВА, Чонҗа йезиси:— Биз аилимиз билән «Хошаллиқ» дәм елиш орниға пат-пат келимиз. Бу йәр пәрзәнтлиримизгиму бәк яқиду. Сүйи таза, мулазимити яхши. Йәнә келип, таамлириму бәк мейизлик. Узун сөзниң қисқиси, бу мәркәз заманға лайиқ хизмәт көрситип кәлмәктә. Өз оюм, «Хошаллиқни» мәйрәм, туғулған күн, тәтил күнлирини әстә қаларлиқ өткүзүшкә әң қолайлиқ җай дәп һесаплаймән. Гүлрүз НУРУМОВА, Дардамту йезиси: — Йәр астидин чиққан иссиқ суни хәлиқ бекар «шипалиқ аришаң» дәп атимайдудә. Һәптисигә болмисиму, ейиға бир қетим вақтимизни бөлүп, «Хошаллиқ» дәм елиш орнида иссиқ суниң карамити билән тенимизниму, җенимизниму арам алдуруп қайтимиз. Яш улғайғансири пут-қолниң ағрип туридиғанлиғи тәбиий әһвал. Бу йеқидин аришаң сулири яхши шипа болмақта. Мениң «Хошаллиқ» дәм елиш орнини таллавелишимдики асасий сәвәп, бу йәрдә дәм елиш үчүн барлиқ шараит яритилған. Қабулҗан РӘҺМАНОВ, Алмута шәһири: — Әпсус, йол жирақ болғачқа, аришаң сулириға пат-пат келип, дәм елип қайтишқа вақит яр бәрмәйду. Шундақ болсиму, балилар тәтилгә чиққанда дәрһал Уйғур наһийәсигә сәпәр чекимиз. Тонуш-билишлиримниң мәслиһити, йол-йоруғи билән мошу «Хошаллиқ» дәм елиш орниға кәлдим. Бөлмилири, бассейнлири тәләпкә мувапиқ ясалған, һойла-арамиму азадә. Гөдәкләргә беғишланған оюн мәйданчилири бар. Баһасиму әрзән.