• Тонушуп қоюң
• 07 Желтоқсан, 2017

«Яшларға билим вә сәвир-тақәт тиләймән»

 Яш тиҗарәтчи Шаһмурат Мутәллип 1990-жили Алмута вилайити Или наһийәсиниң КазЦИК йезисида дунияға кәлгән. Мәзкүр йезидики Ануар Молдабеков намидики мәктәпни «Алтун бәлгүгә» тамамлап, Алмутидики Туран университетиниң ихтисат факультетиға оқушқа чүшиду. Шаһмурат билимини техиму мукәммәлләштүрүш нийитидә магистратурида вә Малайзияниң Куало Лумпур шәһиридә билим алиду. Һазир у «AGK-Іnvest» җавапкәрлиги чәкләнгән йолдашлиғиниң баш мудири. Йеқинда биз униң билән учришип, төвәндики соаллар билән мураҗиәт қилған едуқ. — Шаһмурат, сиз балилиқ чеғиңизда ким болушни арман қилған едиңиз? — Мән момам билән бовамниң қолида өстүм. Турмушниң азду-тола қийинчилиқлириға дуч кәлгинимниму йошурмаймән. Шуңлашқа болса керәк, балилиқтики арминим — чоң тиҗарәтчи болуп, хәйрихаһлиқ паалийәт билән шуғуллиниш еди. — Әмгәк паалийитиңизни қәйәрдә башлидиңиз? — Дәсләп тонулған меценат Дилмурат Кузиев рәһбәрлигидики «БеНТ» акционерлиқ җәмийитигә аддий ишчи болуп ишқа орунлаштим. У йәрдә сәккиз жилға йеқин вақит ишлидим. Растини ейтсам, Дилмурат акидин нурғун нәрсиләрни үгәндим. Сәккиз жилниң ичидә вице-президент лавазимиғичә көтирилдим. Пурсәттин пайдилинип, әмгәк паалийитимдә пәқәт йол-йоруқ көрситипла қоймай, атидарчилиқ қилған Дилмурат Пирмуһәммәт оғлиға чәксиз минәтдарлиғимни изһар қилимән. 2016-жилдин башлап, өз алдимизға биллә оқуған балилар билән Маңғистав вилайитиниң Ақтав шәһиридә чоң бетон заводини ечип, қурулуш ширкәтлирини һаҗәтлик материаллар билән тәминләватимиз. — Сизчә тиҗарәтчи болуш қийинму? — Тиҗарәтчи — сөзиниң мәнаси наһайити кәң. Уни асан яки қийин дәп кесип ейтиш тәс. Мәсилән, бизниң ишимизни мән, «бир тирикчилик» дегән болар едим. Һәрқандақ тирикчилик тавакәлчиликтин башлиниду. Тавакәлчиликкә бәл бағлиған адәм тирикчилик қилалайду. Андин адәм балиси ениқ бир мәхсәтни көзлигән һалда, иш башлиши керәк. Шундақ қилғандила у арминиға йетәләйду. — Келәчәктики иш-реҗилириңиз һәққидә ейтип өтсиңиз. — Реҗиләр наһайити көп. Қурулуш саһасида чоң бир корпорацияни тәшкил қилиш оюм бар. Униң арқилиқ елимизниң ихтисадий тәрәққиятиға биркишилик үлүшүмни қошсам дәймән. Турмуши начар аилиләргә ярдәм қилиш, ишсиз жүргән яшларниң санини азайтиш, бәзи яшларниң вәтәнпәрвәрлик һис-туйғусини ойғитиш нийитимизму йоқ әмәс. — Ейтмақчи, яшларға ейтар қандақ тилигиңиз бар? — Мән яшларниң әң алди билән өзиниң күчигә ишинишини, алдиға бәлгүлүк бир мәхсәт қоюп, тинмай әмгәк қилишини халиған болар едим. Дуч кәлгән қийинчилиқларни билим, сәвир-тақәт билән йеңип чиқишини тиләймән. — Сөһбитиңизгә рәхмәт! Сөһбәтләшкән Адиләм МӘСИМҖАН.