• «Мәшъәлниң» меһмини
  • 07 Желтоқсан, 2017

“Тиришчанлиғим арқилиқ арминимға йәттим”

Исми: Венерәм Фамилияси: Нурахунова Туғулған жили: 1989 Кәспи: офтальмолог/ Бүгүнки күндә қандақла саһада болмисун, өзлириниң пидакаранә әмгиги билән утуқ қазиниватқан уйғур яшлири йетәрлик. Ишәшлик ейталаймизки, уларниң һәммиси дегидәк алий билим елип, җумһурийитимизниң ихтисадий-иҗтимаий тәрәққиятиға салмақлиқ һәссисини қошуватиду. Болупму әң қийин вә жуқури җавапкәрликни тәләп қилидиған медицина саһасидиму башқилардин қалмай, таллиған кәспи бойичә илмий ишлар билән шуғуллиниватқан қаракөзлиримизни көргиниңдә, мәғрурлиниш илкидә хошаллиққа бөлинисән. Биз бүгүн яшлар бетидә әйнә шундақ утуқларға қол йәткүзгән һәм һазирму илмий ишлар үстидә қизғин паалийәт жүргүзүватқан замандишимиз Венерәм Нурахуновани гезитханларға тонуштурушни тоғра көрдуқ. У Алмута шәһиридики 65-мәктәпни вә җумһурийәтлик медицина колледжини қизил дипломға тамамлиған. Кичигидин ақхалатлиқ кәсип егиси атилишни арман қилған Венерәм колледждин кейин ойланмайла һөҗҗәтлирини С.Асфендияров намидики Қазақ миллий медицина университетиға тапшуруп, шу жилила «Көз ағриқлири вә уни давалаш» факультетиға оқушқа чүшиду. Қабилийәтлик яш қиз билим елиш җәриянида университет даирисидә вә униң сиртида уюштурулған конференцияләргә иштрак қилип, билимини техиму мукәммәлләштүриду. Қисқиси, 2013 – 2016-жиллар арилиғида Россияниң Саратов шәһиридә, җумһурийитимизниң җай-җайлирида өткән медицина саһасиға мунасивәтлик, шуниң ичидә хирургия, микрохирургия вә имунология бойичә конференция-семинарларға қатнишип, докладлар оқуйду. Буниңдин ташқири, 2015-жили илмий әмгәкләр конкурсида Баш мукапатқа муйәссәр болуши — униң һәқиқәтәнму өз кәспини сөйидиған вә бу саһада чоқум егиз даванлардин ашидиғанлиғиниң ярқин ипадисидур. Көз ағриқлири Қазақ илмий-тәтқиқат институтиниң резиденти Венерәм Нурахунова яш болушиға қаримай, һеликәм көз ағриғиға муптила болуп, һаятниң ләззитини сүрүш имканийитидин мәһрум болған көплигән бемарларниң көзини ечип, хошаллиқ әта қиливатиду. Шуниң билән биллә, у Қазақстан медицинисиниң тәрәққиятиға биркишилик һәссисини қошуватиду. Өткәндә униң билән сөһбәтлишип қалдим. – Венерәм Асимҗан қизи, сиз медицина саһасиға қандақ келип қалдиңиз? – Бу йәрдә һеч қандақ сир йоқ. Дохтур болушни кичигимдин арман қилаттим. Әлвәттә, шу арминимға йәткичә, нурғун оқушқа, издинишкә һәм әмгәк қилишқа тоғра кәлди. Шундақ болсиму, мән буниңға һәргизму пушайман қилмаймән. — Сиз немә үчүн нәқ офтальмология саһасини таллавалдиңиз? – Колледждин кейин хирургия факультетиға һөҗҗәтлиримни тапшураймекин дегән оюм бар еди. Амма бир күни дадам билән параңлишип олтарғанда, у туюқсиз «Немишкә офтальмология әмәс?» дегән соални қойди. Мән ойлинип қалдим. Униңдин авал мән көргән, андин офтальмология саһаси бойичә 240 кәшпиятниң муәллипи С.В. Федоров һәққидә фильмму мениң бу саһани таллишимға сәвәп болди, дәп ейталаймән. Кейинирәк, бош вақит тапсамла, шу кинони көрүп, униңдин болғуси кәспимгә аит көп нәрсиләрни үгәндим. Өзәңларға мәлумки, көз инсан һаятида муһим роль атқуриду. Әнди гөзәл тәбиәт мәнзирилирини вә аләмниң башқиму карамәтлирини көридиған көздин айрилсақ — һаятимизниң мәзмуниниң түгигини. Бизниң мәхситимиз — көз ағриғиниң дәрдини тартиватқанларниң дәрдигә дәрман болуштин ибарәт. – Сиз яш болушиңизға қаримай, көплигән утуқларға қол йәткүзүпсиз. Буниң сири немидә? – Сир дегидәк сирим йоқ. Мени арман-мәхсәтлирим алға йетәклиди. Мән шу йолда тинмай әмгәк қиливатимән, халас. – Яшларға қандақ мәслиһәт бәргән болаттиңиз? – Һазирқи заманда оқуймән десәң, барлиқ шараит моҗут. Буниңға ата-аниларму хошал болиду. Шуңлашқиму уларниң еқидисини ақлап, бүгүнки күн тәливигә лайиқ илим елип, елиңниң, хәлқиңниң сөйүмлүк пәрзәнди болғанға немә йәтсун. Бәхтинур СИДИҚОВА.

507 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы