• Әхбаратлар еқими
• 07 Желтоқсан, 2017

Қазақстан оттуз бәшинчи орунда

Қазақстан Legatum Institute хәлиқара мәркизи тәтқиқатлириниң нәтиҗилири бойичә билим бериш индексида дунияда оттуз бәшинчи орунни егилиди. Бу һәққидә Қазақстан Җумһурийити Билим вә пән министрлигиниң мәтбуат хизмити хәвәрлиди.«Қазақстан билим бериш индекси бойичә оттуз бәшинчи орунни егилиди. МДҺ әллири ичидә пәқәт Россия Қазақстан алдида туриду (26-орун). Тәкитләш лазимки, әйнә шу Legatum Institute мәлуматлири бойичә биздә билим дәриҗиси Хитай вә Түркиягә қариғанда жуқури» дәп тәкитләнгән министрликниң тарқатқан мәлуматлирида. Қошумчә қилиш керәкки, бизниң җумһурийитимиз «Билим» категорияси бойичә дайим дуниядики қириқ күчлүк дөләт қатариға кирип турған. Дөлитимиз шундақла Мәркизий вә Ғәрбий Азиядә билим бериш саһасида әң күчлүк дөләт сүпитидә етирап қилинған. 2011-жили болса, ЮНЕСКОниң «Билим һәммә үчүн» индексида биринчи орунни егилигән еди. Legatum Institute хәлиқара мәркизиниң һесавитиға бенаән, Қазақстан билим бериш саһаси бойичә дуниядики вә региондики (Таҗикстан вә Қирғизстан) оттура дәриҗидин бирқәдәр жуқури туриду. «Бизниң бу утуқлиримиз тәсадипи әмәс. Чүнки «Қазақстан-2050» программиси даирисидә аһалиниң саватини 99,8 пайизға вә башланғуч синипларда билим бериш дәриҗисини 100 пайизға йәткүзүш бойичә нурғун ишлар әмәлгә ашурулуватиду. Шундақла қизлар вә балиларни бу җәриянға җәлип қилиш җәһәттин дунияда әң жуқури көрсәткүчләргә егә болмақта» дәп тәкитләнгән Билим вә пән министрлигиниң әхбаритида. Мәзкүр рейтинг Бирләшкән Милләтләр Тәшкилати, Дуниявий банк, Ихтисадий һәмкарлиқ вә Тәрәққият тәшкилати, Дуниявий сода тәшкилати, Gallup, Economist Intelligence Unit, IDC, Pyramid Research тәшкилатлириниң статистикилиқ мәлуматлириға асаслинип тәйярланған. Бу индекс шундақла тоққуз категория бойичә, йәни җәмийәт һаяти вә паравәнлиги, ихтисат, тиҗарәт, башқуруш, билим бериш, саламәтликни сақлаш, бехәтәрлик, шәхсий әркинлик, иҗтимаий капитал, экология охшаш категорияләр асасида көрситилиду