- Йеңилиқлар
- 17 Тамыз, 2012
«Назугумға» һөрмәт
«Бағвәнләр» җәмийитиниң наһийәмиздә тәшкил қилинғиниға көп вақит болмиди. Лекин җәмийәт әзалири өзлириниң виждан әмри билән изгүлүк ишларниң тәшәббускари болуп, наһийә җамаәтчилиги арисида иллиқ инкасларға егә болмақта.
Ана тилимизда билим еливатқан талантлиқ яш ғунчиларни рәғбәтләндүрүш, һәрхил чарә-тәдбирләргә һамийлиқ қилиш охшаш хәйрихаһлиқ ишларға дайим һазир турған бағвәнләр наһийәдә бағвәнчилик билән шуғуллинишқа бәл бағлиған жутдашларға ярдәм қолини созуп, уларға ата кәспиниң қир-сирлирини үгитип келиватиду. Мошу мәхсәттә улар саһаға аит мәсилиләр, утуқ вә камчилиқлар һәққидә пикир-мулаһизиләр жүргүзүп турушни тоғра көрүп, ейиға бир қетим семинарларни өткүзүп кәлмәктә.
Өткән айниң бешида кәтмәнлик бағвән Турсун Долаевниң егилигидә өткүзүлгән әйнә шундақ баш қошушта бағвәнчилик мавзуси билән биллә Назугум өңкүриниң бүгүнки әһвали хусусидиму гәп қозғилип, шу йәрдин улар Назугум өңкүригә қарап йол тутти. Тарихий әһмийәткә егә бу муқәддәс җайниң ечинишлиқ әһвалини көргән бағвәнләр шу қетимда өңкүр әтрапини тазилап, рәткә кәлтүрүш тоғрилиқ қарар қобул қилған еди.
Әйнә шуниңға мувапиқ бәлгүләнгән күни, йәни мошу айниң биринчи шәнбиси , җәмийәт әзалири аилилири билән Назугум өңкүригә йол алди. Җамаити җәм болған бағвәнләр жит селип, қәһриман қизимизниң роһиға атап қуръан тилавәт қилди. Андин чоң-кичикниң һәммисила әтрапни тазилаш ишлириға киришти. Әхләтләр сиртқа тошулуп, қир үстидин өңкүргә елип киридиған ялғуз аяқ йолға селинған бетон плиткиларниң сунуп, бузулған җайлири әслигә кәлтүрилди. Өстәңниң ичи тазилинип, уни яқилап та өңкүрниң босуғисиғичә болған арилиқ төмүр қашалар билән торилип, сирланди. Өстәң үстидики көрүкму рәткә кәлтүрүлди. Йүз миң тәңгидин көпирәк мәбләғ сәрип қилип, бу ишларни көңүллүк кәйпият илкидә бәҗиргән бағвәнләр билән уларниң аилилири пәқәт кәчкә йеқин өйлиригә қайтишти.
Мошу ишлардин бизгә учур бәргән мәзкүр җәмийәт әзаси Абдрим Қурбановниң ейтишичә, бағвәнләр өңкүргә апиридиған йол үстигә зиярәт қилғучиларниң тазилиқ қаидилиригә қәтъий әмәл қилишини агаһландуридиған тахта орнитишни көңлигә пүкүп қоюпту. Шундақла кәлгүсидә Назугумниң рәсими, өмүрбаяни вә кәчмишлиридин мәлумат беридиған тахтиларниму орнитишни ойлаштуруветипту.
Хулләс, өз вақтида миллий қәһриман қизимизға пана болған тәвәррүк пинһан 20 жиллиқ үзүлүштин кейин тазилинип, рәтлинип қалди. Бәкму соваплиқ ишни қолға алған бағвәнләрниң тәшәббусини кәлгүсидә қоллап, әнъәнигә айландуридиған сахавәтлик жигитләр мәйданға чиқса, нур үстигә нур болар еди. Әлвәттә, ғурури үстүн әзимәтлиримиз йоқ әмәс. Амма биз ойғанғичә , арилиқта йәнә 20 жил өтүп кетәрму дегән тәшвиш-әндишә көңүлни угилайду.
Махмут ИСРАПИЛОВ.
Уйғур наһийәси.
565 рет
көрсетілді0
пікір
