• Җәмийәтлик тәшкилатларда
• 15 Желтоқсан, 2017

Муһәббити чәксиз Муһәббәт

Йеқинда таразлиқ уйғурлар шәһәрдики «Достлуқ өйидә» Уйғур мәдәнийәт күнлирини нишанлап өтти. Униңға шәһәрниң уйғур җамаәтчилиги вә Җамбул вилайитидә паалийәт елип бериватқан миллий мәдәнийәт мәркәзлириниң вәкиллири иштрак қилди. Бәхтишат СОПИЕВ,«Уйғур авази» /Мәрасим студентлар билән мәктәп оқуғучилириниң «Достлуқ өйини» вә шу йәрдики мирасгаһни зиярәт қилиштин башланди. Андин бу йәрдә меһманлар Махмут Қәшқәрий намидики Җамбул вилайәтлик Уйғур этномәдийәт мәркизиниң паалийити билән кәңирәк тонушти. Бу мәркәз әзалири бийил өзлириниң паалийәтчанлиғи түпәйли 60тин ошуқ Пәхрий ярлиқ вә дипломлар билән тәғдирлинипту. Уларниң арисидики вилайәт һакиминиң «Меһир-шәпқәтлиги үчүн» мукапитиму бар. Бу мукапат мәркәз рәиси Муһәббәт Турдиеваниң меһир-сахавәтлик әмгиги үчүн берилгән. Мәрасим давамида йәнә шу мәркәз рәисиниң күч чиқириши билән «Қамқор» хәйрихаһлиқ акцияси уюштурулуп, униңда шәһәрдики тәминати начар вә көпбалилиқ аниларға маддий ярдәм көрситилди. Бу бәхиткә еришкәнләр арисида «Достлуқ» өйиниң һойла сүпәргүчиси, алтә балиниң аниси Гүлмира Мирзәхмәтоваму бар. Мәрасимда Җамбул вилайәтлик Қазақстан хәлқи Ассамблеясиниң кативат рәһбири Маржан Төреғул қизи, «Достлуқ өйиниң» мудири Рано Мәхсүт қизи, жигитбеши Абдуқейим Мусаев, Ханим-қизлар кеңишиниң рәиси Хәйринисә Әхмәтова, колледж мудири Фарида Фарид қизи вә башқилар сөзгә чиқип, мәзкүр тәвәдә хәлиқләр достлуғини мустәһкәмләшкә салмақлиқ һәссисини қошуватқан, шундақла ушбу мәдәнийәт күнлирини уюштурушта көп күч чиқарған Махмут Қәшқәрий намидики Җамбул вилайәтлик Уйғур этномәдәнийәт мәркизиниң рәһбәрлигигә өзлириниң иҗабий баһасини бәрди. Сөзгә чиққучилар «Муһәббәтниң муһәббити чәксиз, у һәрқандақ ишни ишқи билән әмәлгә ашуриду» дейишти. Шуни қошумчә қилиш керәкки, мәзкүр мәркәз рәиси Муһәббәт Турдиева 2017-жилниң йәкүни бойичә «Жилниң әң яхши медиатори» аталди. Мәдәнийәт күни даирисидә меһманлар «Ғунчә» уссулчилар ансамбли вә башқиму миллий мәркәзләр сәнъәткарлири тәйярлиған концертлиқ программини тамашә қилди.