• Җәмийәтлик тәшкилатларда
  • 15 Желтоқсан, 2017

Муһим мәсилиләр қаралди

  Мәшүр САСИҚОВ, «Уйғур авази»/ Өткән һәптидә Талғир наһийәлик Уйғур этномәдәнийәт мәркизиниң уюштуруши билән Қизил Ғәйрәт йезисида наһийәдә паалийәт жүргүзүватқан жигитбашлири, жут активистлири вә ханим-қизлири жиғилған баш қошуш болуп өтти. Униңда күн тәртивигә қоюлған бирқатар мәсилиләр муһакимә қилинип, улар һәққидә пикир-мулаһизиләр жүргүзүлди. Баш қошушқа риясәтчилик қилған наһийәлик Уйғур этномәдәнийәт мәркизиниң рәиси Иминҗан Тохтахунов дәсләп көпчиликкә наһийәдә атқурулуватқан ишлар һәққидә әтраплиқ әхбарат бәргәч, наһийә даирисидә өткүзүлүватқан барлиқ мәдәний чарә-тәдбирләрдин чәттә қалмайдиған Банум Бавдинова билән Октябрь Қурбаниязовни ҖУЭМниң башқарма әзалиғиға намзат қилип көрсәтти. Рәисниң бу пикрини көпчилик биреғиздин қоллап-қувәтлиди. Мошу баш қошушқа әттәй кәлгән җумһурийәтлик Уйғур этномәдәнийәт мәркизиниң иҗраий мудири Зихруллам Қурванбақиев билән Қ.Ғоҗамияров намидики дөләт академиялик Уйғур театриниң администратори Абдусаттар Турдибақиев вә Талғир наһийәсиниң баш жигитбеши Октябрь Қурбанниязов новәт билән сөзгә чиқип, көтириливатқан мәсилиләр бойичә өз пикирлирини оттуриға салди. Мәсилән, Абдусаттар Турдибақиев меһманларни кейинки вақитларда театр коллективиниң қол йәткүзгән утуқлири вә келәчәктә тамашибинлар диққитигә һавалә қилиш алдида турған әсәрләр тоғрисида ейтип өтсә, Зихруллам Қурванбақиев ҖУЭМниң паалийити һәққидә умумий чүшәнчә берип, Талғир наһийәсиниң җамаәтчилиги ҖУЭМ тәрипидин уюштурулуватқан һәрқандақ чарә-тәдбирләргә паал қатнишиватқанлиғини қәйт қилған һалда, уларға миннәтдарлиғини билдүрди. Шундақла натиқлар көпчилик тәрипидин қоюлған соалларға җавап бәрди һәм азду-тола йешилмәйватқан мәсилиләр үстидә җавапкәр хадимларниң иш елип бериватқанлиғиниму әслитип өтти. Андин наһийәниң баш жигитбеши Октябрь Қурбанниязов җамаәтчилик арисида, йәни нәзир-чирақ вә той-төкүнләрдә орун еливатқан камчилиқларни тилға елип, уларни өз йолида көпчиликкә чүшәндүрүш – бүгүн мошу жиғинға қатнишиватқан жут активистлириниң, жигитбашлириниң вәзиписи екәнлигини алаһидә тәкитлиди. Униң бу сөзидин кейин залда мусибәт болған өйдә қазан қайнитиш билән пәйшәнбилик өткүзүш яки өткүзмәслик һәққидә Бу мәсилидә жигитбашлири сәвирчанлиқ тонутуп, мәсилиниң маһийитини чүшәнмигәнләргә чүшәндүрди. Баш қошуш давамида Иминҗан Тохтахунов, аилә шараитиға бола, өзиниң иштин кетиш нийити бар екәнлигини билдүрүп, һазирчә өзиниң орунбасари қилип, наһийәлик мәдәнийәт мәркизи йенидики спорт кеңишиниң рәиси Әкрәм Нурдуновниң намзитини көрсәтти. Бу жуқури җавапкәрликни тәләп қилидиған ишқа Әкрәм Нурдунов көпчиликниң илтимаси билән разилиғини бәргән болсиму, бу мәсилә ҖУЭМ рәисиниң қарари билән йешилидиған болди. Бирқатар муһим мәсилиләр айдиңлашқан жиғинда наһийә даирисидә өткүзүлүватқан спорт мусабиқилири һәққидиму сөз болди. Мәсилән, айрим турнир-чемпионатлар һөкүмәт тәрипидин рухсәт елинмай, коммерциялик йөнилиштә уюштурулуп, пәқәт пул тепиш мәхситидә өткүзүлүветипту. Һә, униңға мәдәнийәт мәркизи җавап беришкә тоғра келидекән. Шуңлашқа һәрқандақ спорт мусабиқисини уюштуруватқан адәм, мәдәнийәт мәркизи билән мәслиһәтлишип, андин өткүзүшни йолға селиш керәклигини чүшәндүрүш лазим. Әксичә әһвалда, мәдәнийәт мәркизи бу мәсилидә җавапкәрликни бойниға алмайду. Баш қошушта көтирилгән йәнә бир мәсилә – миллий нәширлиримизгә муштири топлашниң кетип бериши вә йәкүни тоғрисидиму қатнашқучилар өз пикирлирини ейтти. Йошуридиғини йоқки, бийил у наһайити гиҗиң жүргүзүлүватиду. Бу йәрдә, әлвәттә, мәвсүмни утуқлуқ аяқлаштурушқа ат чепиватқан ака-һәдиләрниң әмгигини начар дейиштин жирақмиз. Амма мошу баш қошушниң өзидила уларниң арисидиму бу ишқа бепәрва қараватқанларниң барлиғиға көз йәткүздуқ. Буниңдин ташқири, һәрхил банә-сәвәпләрни тоқуп, гезитқа йезилмаслиқниң амалини қиливатқан қериндашлиримизниң жилдин-жилға көпийиватқанлиғи һәммимизни әпсусландурмақта. Баш қошуш ахирида униң қатнашқучилири өз вәзипилирини атқурушта бар күч-ғәйритини сәрип қилишқа тәйяр екәнлигини очуқ изһар қилди.

128 рет

көрсетілді

0

пікір
Алдыңғы мақала Муһәббити чәксиз Муһәббәт
Келесі мақала Йеңи мәркәз қурулди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы