- Әхбаратлар еқими
- 05 Қаңтар, 2018
Хәйрихаһлиқ балға қатнашти
28-декабрьда Нурсултан Назарбаев пайтәхттә Йеңи жиллиқ хәйрихаһлиқ балға қатнашти. Дөләт рәһбири жиғилғанларға мураҗиәт қилип, Йеңи жил мәйриминиң һәрқачан бизгә хуш кәйпият вә парлақ келәчәккә болған үмүт-ишәнчиләрни елип келидиғанлиғини тәкитлиди. – Аяқлишиватқан жил ярқин вә миқияслиқ вақиәләр билән хатиримиздә қалиду. Қишлиқ Универсиада һәм «ЭКСПО-2017» Хәлиқара көргәзмиси қазақстанлиқларға вә чәтәллик меһманларға һәқиқий спорт һәм технологияләр мәйримини һәдийә қилди. Биз Ислам һәмкарлиқ тәшкилатиниң саммитини жуқури дәриҗидә өткүздуқ, – деди Қазақстан Президенти.
Нурсултан Назарбаев мәмликитимизниң БМТ Бехәтәрлик Кеңишидики течлиқ тәшәббуслирини илгирилитиш мәсилилиригә вә келәр жили Қазақстанниң мошу хәлиқара тәшкилатқа рәислик қилиш истиқбалиға айрим тохтилип өтти.
– Бу дунияниң 200дин ошуқ мәмликитиниң яш дөләткә болған ишәнчиси. Келәр жили Қазақстанда Дуниявий вә әнъәнивий динлар йетәкчилириниң қурултийи, Азиядики Өзара һәрикәт вә ишәнчә чарилири кеңәшмиси вә башқиму муһим чарә-тәдбирләр өткүзүлүп, силәр уларниң шаһиди болусиләр. Мошу барлиқ утуқлар – һәрбиримизниң күч-қувитимизниң вә зәрбидар әмгигимизниң нәтиҗиси. Бизниң һәрбир граждинимизниң Қазақстанниң утуқлириға мунасивәтлик екәнлигини һис қилиши муһимдур, – деди Дөләт рәһбири.
Ахирида Нурсултан Назарбаев жиғилғанларни қәдәм тәшрип қиливатқан Йеңи жил билән тәбрикләп, барлиқ қазақстанлиқларға саламәтлик, хошаллиқ вә бәхит-саадәт тилиди.
– Өйлиримиз изгүлүккә вә паравәнликкә толуп-ташсун, – деди Қазақстан Президенти.
Йеңижиллиқ балдин чүшкән барлиқ мәбләғ хәйрихаһлиқ мәхсәтләргә сәрип қилиниду, – дәп хәвәрләйду Дөләт рәһбириниң Мәтбуат хизмити.
464 рет
көрсетілді0
пікір