• Һакимлар һесавити
  • 01 Ақпан, 2018

Иш техи нурғун

Сабирәм ӘНВӘРОВА,«Уйғур авази»/ Уйғур наһийәсиниң һакими Шөһрәт Нурахуновниң һесавити Кәтмән, Дардамту, Ақтам, Түгмән йезилирида давам қилди. Һаким һесавитида наһийәниң 2017-жилқи иҗтимаий-ихтисадий тәрәққиятиниң нәтиҗилири вә 2018-жилниң реҗилири тоғрилиқ әтраплиқ тохталди. Наһийә һакиминиң һесавитидин кейин кәтмәнликләрдин көплигән соаллар келип чүшти. Мәсилән, өткән жили йезидики мәктәп мурәккәп җөндәштин өтүп, техникилиқ хизмәтчиләргә июльдин ноябрь ейиғичә 50 пайиз мааш төләнгән. Турғунлар буниң қанчилик қанунға мувапиқ келидиғанлиғини сориди. Ушбу соалға наһийәлик билим бөлүминиң башлиғи Адилҗан Һаширов җавап берип, қанунда көрситилгән тәләпләргә мувапиқ һәқ төләнгәнлигини уқтурди. Шундақла йезидики таза ичидиған суға мәхсус фильтр қоюлмиғанлиғи, балилар бағчиси алдида мәхсус йол бәлгүсиниң йоқлуғи охшаш бир түркүм соалларғиму тегишлик җавап қайтурулди. Йеза турғуни Мағжан Нурболатулы «Чалкөдә яйлиғиға берип-қайтидиған йол җөндәлсә» дегән пикирни ейтса, пешқәдәм устаз Тоқан Әлбеков мәктәп мурәккәп җөндәштин өткини билән су билән һаҗәтханиниң ишқа қошулмиғанлиғини, электр симлириниң дурус тартилмиғанлиғини әпсуслиниш билән тәкитлиди. *** Дардамту йезилиқ округида өткән жиғинда округ һакими Мақсат Мадамилов «Алтын асық», «Сыбаға», «Құлан» программилири бойичә иш жүргүзүватқан йеза адәмлириниң күн санап көпийиватқанлиғини пәхирлиниш билән атап өтти. Шундақла «Аришаң» участкисида теплица, дәм елиш орунлириниң жилдин-жилға сани өсүп, округтики ишсизлар саниниң азийиватқанлиғини алаһидә тилға алди. Наһийә һакими өз новитидә көпчиликни 2018-жилниң реҗилири билән тонуштурди. Йеңи иш орунлири билән заводлар ечилип, билим, саламәтлик, тиҗарәт, йеза егилиги саһалириниң риваҗлинип, наһийәниң күндин-күнгә гүллинип келиватқанлиғини мисаллар билән испатлиди. Бу йәрдиму көпчилик наһийә һакимиға өзлирини ойландуруп жүргән соаллар билән мураҗиәт қилди. Җүмлидин турғунлар Дардамту йезилиқ округи 4 йезидин һәм «Аришаң» участкисидин тәркип тапқан чоң округларниң бири болсиму бемарларға хизмәт көрситишкә «тез ярдәм» машиниси билән мутәхәссисләрниң йетишмәйватқанлиғини ечинишлиқ билән ейтип өтүшти. Жутниң жигитбеши Селимахун Әлаев чәт кочиларға электр чириғи тартилип, клуб җөндәлсә, мал сойидиған мәйдан ишқа қошулса, дегән ой-пикрини изһар қилса, Шуңқар йезисиниң турғуни Бақытбек Бектурсунов яйлаққа көчүп-қонушниң қийин болуватқанлиғини әскәртип, йолларни ясашқа һөкүмәттин ярдәм сориди. Ардолатилиқ Мухрәт Бушаров һакимға яшларниң спортзал селип бериш илтимасини йәткүзди. Жут мөтивәри Қизир Стамқулов йезида оғрилиқниң көпийиватқанлиғини, суғирилидиған йәрни елишниң қийинға чүшүватқанлиғини тәкитлиди. Һеким Ибрагимов кочиларға электр чириғи тартиш пикри билән ортақлашти. Чүнки мәктәпләр 5 күнлүккә авушқанлиқтин, чүштин кейин оқуйдиған оқуғучилар дәристин кәч чиқиду, болупму, қишниң һазирқидәк күнлири мәлиниң четидә туридиған балиларға қатнаш қийин болуветипту. *** Наһийә һакими Шөһрәт Нурахуновниң бир жиллиқ һесавитини диққәт билән тиңшиған ақтамлиқлар униңға: «Ақтамға йеңи амбулатория селинамду?», шундақла «Тез ярдәм» машиниси бөлүнәмду?» дегән соаллар билән мураҗиәт қилди. Буниңға наһийәлик дохтурханиниң мутәхәссиси Рәхмәтҗан Зәйнидинов төвәндикидәк җавап қайтурди: — Кона амбулаторияниң бенасини мурәккәп җөндәштин өткүзүшкә болмайдекән. Келәчәктә йеңисини селиш мәсилиси қариливатиду. Амма бу бир-икки айниң ичидә һәл болуп кетидиған мәсилә әмәс. “Тез ярдәм” машинисини һазирчә Түгмәндин яки Чонҗидин чақиртиш мүмкинчилиги бар, — деди у. Йеза турғунлири тәрипидин имамниң мааши тоғрисидиму сөз қозғалди. Улар “имамға жиққан ахчини наһийәгә өткүзмәй, өзимиз тапшурсақ, бу мәсилини йезилиқ округ даирисидә һәл қилсақ”, дегән пикирни ейтти. Жиғинда газ мәһкимиси, клуб вә округ һакимийити беналирини селиш мәсилилириму муһакимигә чүшти. Ш.Нурахунов бийил Чонҗиға газ киргүзүлсә, новәттә Ақтам йезисиниң турғанлиғини хәвәрлиди. *** Түгмәндики жиғинға наһийә һакимидин бөләк, наһийәлик мәслиһәтниң кативи Нурәким Есенбайулы, «Нур Отан» партияси Уйғур наһийәлик шөбиси рәисиниң биринчи орунбасари Мәулен Муқажанулы, наһийәлик ички ишлар бөлүминиң башлиғи Амангелди Қудайбердиев вә башқилар қатнашти. Дәсләп Түгмән йеза округиниң һакими Миршат Насиров сөзгә чиқип, түгмәнликләрниң йеза егилиги бойичә әмәлгә ашурған ишлириға тәпсилий тохталди. Җүмлидин кейинки жилларда бағ бәрпа қилишниң кәң қанат йейиватқанлиғиниму тилға алди. Доклад җәриянида һаким хәлиқниң демографиялик әһвалиға тохтилишниму унтумиди. Турғунлар намидин сөзгә чиққан Қ.Мәмиров етиз-ериқ ишлирида су тапчиллиғиниң қийинчилиқ туғдуруватқанлиғини ейтип, «йезиға су тосмиси селинса» дегән ой-пикрини йәткүзди. «Жұлдыз» балилар бағчисини ачқан Адиләм Әкбәрова алдики реҗилири билән ортақлашса, Түгмән йеза округидин сайланған депутат Зәйнидин Зунун Узунтам йезисиниң бүгүнки әһвалиға тохтилип өтти. Мәзкүр учришишта йәр мәсилиси һәққидиму гәп қозғалди. Аһалиниң «Түгмән йезилиқ округидики йәрләр немишкә сирттин кәлгән инвесторларға берилиши керәк?» дегән соалға наһийә һакими әтраплиқ чүшәнчә бәрди. Барлиқ округларда наһийә һакиминиң һесавитиға “қанаәтлинәрлик” дегән баһа берилди.

227 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы