• Әхбаратлар еқими
• 01 Ақпан, 2018

Маарипи риваҗланған милләтниңла миллийлиги сақлиниду

Шәмшидин АЮПОВ, «Уйғур авази»/ Дәрһәқиқәт, заманивий билим елиш — һазир һаят оттуриға қоюватқан муһим тәләпләрниң бири. Әйнә шуниң үчүнму Дөләт рәһбириниң Қазақстан хәлқигә Мәктүбидә мундақ дейилгән: «Билим бериш системисиниң барлиқ дәриҗиси заманға лайиқ вә ихтисадий еһтияҗлириға җавап бериши шәрт. Бу җәһәттин муәллим мутәхәссислигиниң аброй-инавитини ашуруш керәк...». Президент шундақла 2016 — 2017-жиллири Қазақстандики иҗтимаий төләмләрниң үч қетим көпәйтилгәнлигини ядимизға салди. Униң ичидә билим бериш саһаси хадимлириниңму маашлири — 29 пайизғичә көтирилгән. «Бу җәриян давамлишиду, — дәп тәкитлиди Дөләт рәһбири. — Оқуш программилириниң йеңиланған мәзмуни даирисидә билим алған муәллимләрниң лавазимлиқ мааши билимини испатлишишиға бағлиқ 30дин 50 пайизғичә өсиду». Умумән, биз Президентниң заманивий билим бериш вә квалификациялик кадрларни тәйярлаш системисини йәниму тәрәққий әткүзүш, педагогларни оқутуш вә уларниң билимини ашуруш йоллирини қайта қараш тоғрилиқ идеясини толуқ қоллап-қувәтлишимиз лазим. Һәқиқәтәнму, заманивий маарип системиси һәққидә җиддий ойлинидиған вақит аллиқачан кәлди. Шундақ екән, биз, қазақстанлиқ уйғурларму, умумән, қайсила мәсилидә болмисун, хәлқимизгә садақәтлик көрситип, мәдәткар болушимиз керәк. Әң муһими, биз миллий маарипимизға аит мәсилиләрни һәл қилиш, һисдаш, тәрәпдарларни көпәйтиш турғусидин паалийәт елип беришимиз лазим. Ундақ болғини, миллий маарипсиз миллий бирликниңму, иттипақлиқниңму болуши натайин. Әнди миллий мәктәплиримиздә паалийәт елип бериватқан муәллимлиримиз пәқәт маашиниң өскинигила хуш болмай, Президент тәкитлигәндәк, «Өзиниң тарихини, тилини, мәдәнийитини өзләштүргән, шундақла заманға лайиқ, чәт тилини билидиған, илғар вә дуниявий көзқариши бар», һәртәрәплимә йетилгән, риқабәткә қабил шәхсни тәрбийиләп чиқиришни мәхсәт қилиши керәк. Демәк, миллитимизниң истиқбали әң алди билән миллий маарипқа бағлиқ дегән сөз. Һә, миллий маарипи ронақ тапқан хәлиқниңла миллийлиги толуқ сақлинип, ихтисадий-иҗтимаий турмушиму, мәнивий һаятиму изчил түрдә риваҗлиниду, йүксилиду. Дәрвәқә, бүгүнки күндә Қазақстан дөлити һәммә хәлиқләрниң, шу җүмлидин уйғурларниң өз ана тилида билим елишини, өз тарихини, мәдәнийитини, урпи-адитини үгинишни мәхсәтлик һалда қоллап-қувәтләватиду. Буниң һәммиси — хәлиқләрниң тәңһоқуқлуғиниң ипадиси. Бу һоқуқлардин толуқ пайдилиниш пәқәт өзимизгила бағлиқ.