• «Уйғур авазиниң» сәйилгаһи
• 08 Ақпан, 2018

Пийма

Пийма күз пәслидә қирқилған қой жуңидин тикилиду. Устилар жуңни юмшитип, чиғ үстигә өтүк шәклидә тәкши яйиду. Ичигә чаплаштурмайдиған рәхт селип, жуңни қамдиғандин кейин, домилитип жиғидудә, шу шәклидә қатуриду. Пийминиң чиң һәм қаттиқ болуши үчүн жуңға кислоталиқ суюқлуқ, күнҗүр қатарлиқ маддилар арилаштурулиду. Мундақ аяқ кийим бәк иссиқ болуп, қәһритан қиш күнлири бәкму раһәт беғишлайду. Болупму қиш қаттиқ болидиған, қар көп яғидиған җайларда униң әһмийити зор. Әгәр униң тапан тәрипигә чәм қойдурувалса, узаққичә ярамлиқ болиду. Бүгүнки күндә пийма көпчиликниң диққитини қайтидин өзигә җәлип қилмақта. У пәқәт күндилик турмуштила әмәс, хәлқимизниң тарихини, җуғрапиялик орунлишишини, мәдәнийитини тәтқиқат қилиштиму муһим әһмийәткә егә болмақта. Дияримизға сәяһәт қилип кәлгән чәтәлликләрниңму униңға болған еһтияҗи күчәймәктә.