• Гезитхан пикри
• 08 Ақпан, 2018

Вәтәнпәрвәрлик мавзусиға нахшилар йезилса

Әсирләр қийилиши қазақ хәлқи үчүн чоң хошаллиқ елип кәлди. Мухтар, Абай, Мағжан, Миржақип арман қилған мустәқиллик теңи етип, хәлиқ мәңгүлүк мустәқилликкә еришти. Мән бу мақалини йезиш алдида нурғун ойландим. Мустәқил Қазақ ели мениң хәлқимниң тәрәққияти, тили вә мәдәнийитиниң риваҗлиниши үчүн барлиқ мүмкинчиликләрни яратти. Демәк, биз өзимизниң тилини, мәдәнийити билән тарихини билишкә, үгинишкә һәқлиқмиз. Шуниң билән биллә әвлатлиримизни «Мәңгүлүк әл» ғайиси асасида вәтәнпәрвәрлик роһта тәрбийилишимиз шәрт. Қазақ елиниң дуния хәритисидә мәңгү һәм мәғрур қелиши үчүн барчә қазақстанлиқ, шуниң ичидә уйғур хәлқиму төһпә қошуши вә өзиниң қазақстанлиқ екәнлигидин пәхирлиниши лазим. Тәкитләш керәкки, тәрбийә булиғи — мәктәп. Мәктәптә берилгән тәрбийә балиниң келәчиги үчүн муһим әһмийәткә егә һаят йоли. Муәллим сүпитидә ейтарим, бүгүнки күндә қазақ тилида Астана, ана йәр, Вәтән, мустәқиллик, Президент тоғрилиқ вәтәнпәрвәрлик роһида йезилған нахшилар хелә аммибаплиққа егә. Бизниң қаракөзлиримизниңму ушбу нахшиларға болған қизиқиш һәвәси интайин жуқури дәриҗидә. Бу хошал қиларлиқ әһвал. Амма дәл мошу мавзуларда ана тилимизда йезилған бирму нахшини учриталмидим. Мүмкин барду? Бирақ у аммибаплиққа егә әмәс. Әгәр уйғур тилида қазақстанлиқ вәтәнпәрвәрлик мавзусида әң болмиғанда бир-икки нахша йезилип, иҗра қилинса, нур үстигә нур болар еди. Аршалим ДӘВЛӘТОВ. Ақтам йезиси, Уйғур наһийәси.