• Һакимлар һесавити
  • 08 Ақпан, 2018

«Турмушимиз күндин-күнгә яхшилиниватиду»

Әмгәкчиқазақ наһийәсиниң һакими Бинәли Ысқақ мәзкүр наһийәдики 25 йеза вә Ишиктә шәһәрлик округида өткән жили атқурулған ишлар һәққидә һесават бәрди. «Уйғур авазиниң» Әмгәкчиқазақ наһийәси бойичә өз мухбири Рашидәм РӘҺМАНОВА шуларниң бирнәччисигә қатнишип, әмгәкчиқазақлиқларниң утуқлири билән муң-муһтаҗини билип қайтти. Наһийә һакими аһали билән дәсләпки учришишни Сөгити йеза округидин башлиди. Бинәли Әбдиқаппасулы пат-йеқинда тәвәдә күн электр станциясиниң ишқа қошулидиғанлиғини йәткүзүп, турғунларниң кәйпиятини көтәрди. Округ һакими Еркинбек Дауытқулов жил бойи әмәлгә ашқан ишлар һәққидә һесават бәрди. Округтики 400 дехан егилиги һәрхил зираәтләрни пәрвиш қилидекән. Төрт дукан, 5 киоск, 4 кафе, бир автомашиниларни җөндәш станцияси, навайхана, 2 сатрашхана, йәм тартидиған цех хәлиққә хизмәт қиливетипту. Уларда умумән 48 адәм иш билән тәминләнгән. Булту пластикилиқ ишик-деризә ишләп чиқиридиған цех ечилипту. Бартоғай йеза округидики жиғинму йеқимлиқ хәвәр билән башланди. Бижанов йезисида узун жиллардин бери егисиз қағҗирап турған спорт сарийини йеза турғуни Руслан Қәмирдинов сетивелип, уни ремонтлап, дөләткә һәқсиз қайтурған. Сахавәтлик тиҗарәтчини наһийә һакими қолини елип тәбриклиди. Наһийә һакими башқиларниму Русландин үлгә елип, туғулған йери үчүн аянмай хизмәт қилишқа чақирди. Округ һакими Талғат Өмирбеков булту Байсейит йезисида участкилиқ полиция пунктиниң ечилғанлиғини йәткүзди. Округта 481 дехан егилиги, бир ишләпчиқириш кооперативи, 5 ҖЧЙ паалийәт елип бериветипту. Деханлар паалийитини җанландуруш үчүн дөләттин 2 миллион 604 миң тәңгә субсидия бөлүнгән. Маливай йеза округида әмәлгә ашқан яхшилиқларға тохталған наһийә һакими Бинәли Ысқақ булту йеза турғунлири үчүн мечит селип бәргән Хушияр һаҗим Һосмановниң қизи Рәйһан вә күйоғли Нуртай Ғоҗамбәрдиевларға сәмимий миннәтдарлиғини билдүрди. Округ һакими Дамир Қалдибаев 5260 турғуни бар округ һәққидә тәпсилий доклад оқуди. Маливайда бир йеза егилиги кооперативи, бир ҖЧЙ, 690 дехан егилиги, 22 шәхсий тиҗарәтчи бар. Йеза деханлири асасән көмүқонақ, соя, аптаппеләз, арпа, бедә, көктат вә йәл-йемиш пәрвиш қилидекән. Турғунлар қолида бар 2499 сийир, 6413 қой һәм өшкә, 234 ат вә 2350 тоху билән күн кәчүрүветипту. Йезида булту йүз бәргән чоң хошаллиқларниң бири – «Өңірлерді дамыту» программиси бойичә бюджеттин 6 миллион тәңгә бөлүнүп, су мәсилиси иҗабий һәл болған. Өткән жили Масақ йеза округида «Нұрлы ЖЭСТ» ҖЧЙ 1 миллион 978 миң тәңгигә шамал электр станциясини орнитип, турғунларниң бешини көккә йәткүзсә, тиҗарәтчи Болатжан Нурбеков бир гектар йәрдики теплицисини йәнә бир гектарға кәңәйтип, 35 йеза турғунини иш билән тәминләпту. Ушбу рәқәмләрни пәхирлиниш илкидә атап өткән округ һакими Ертай Нурмаханов йеза егилигини тәрәққий әткүзүш үчүн түзүлгән дөләт программилирини пайдилинип, деханчилиғини җанландурған турғунларниң утуқлириға тохталди. Мәсилән, «Қуат» егилиги «Қулан» программиси бойичә 9 миллион тәңгә несийә елип, илқа беқиветипту. Чәт округларниң бири Қарийота йеза округидики жиғинда наһийә һакими 8 йезиниң җүлмәригән мәктәп, балилар бағчилири вә клуб беналирини әслигә кәлтүрүш бийил Алмута вилайитиниң һакими Амандық Баталовниң қоллап-қувәтлиши билән қолға елинидиғанлиғини хәвәрлиди. Андин округ һакими Ерик Сүлейменов һесават бәрди. Қарийотида 17 кичик вә оттура тиҗарәт тиркилип, 48 адәм иш билән тәминләнгән. Булту интенсивлиқ бағ пәрвиш қилидиған егиликләргә 762 413 455 тәңгә инвестиция тартилип, 350 адәм иш билән тәминләнгән. Ишиктә шәһиридә өткән учришишта Бинәли Ысқақ өткән жили атқурулған ишлар вә келәчәккә бәлгүләнгән реҗиләр һәққидә доклад оқуди. Йеза егилиги. 2017-жилиниң нәтиҗиси бойичә йеза егилиги һосулиниң миқдари 99 миллиард 827 миллион тәңгигә йетипту. Бу көрсәткүч 2016-жили билән селиштурғанда 20 миллиард тәңгигә өскән. Жуқури көрсәткүчләргә қол йәткүзүштә Дөләт рәһбириниң йеза егилиги кооперативлирини қуруш һәққидики сәясити сәвәп болмақта. Өткән жили наһийәдә 16 йеза егилиги кооперативи қурулған. Уларни тәрәққий әткүзүш үчүн бюджеттен 419 миллион тәңгә, йеза егилигини тәрәққий әткүзүш үчүн 2,3 миллиард тәңгә бөлүнгән. «Сыбаға», «Құлан» вә «Алтын Асық» программилири бойичә 7909 гектар йәрдә бағ вә үзүм бағчилири бәрпа болған. Униң 907 гектарини интенсивлиқ бағлар тәшкил қилиду. Дөләт рәһбириниң Мәктүбидики вәзипиләрни әмәлгә ашуруш мәхситидә барлиқ күч-ғәйрәт наһийәниң ресурсини риваҗландурушқа сәрип қилинған. Мошу йөнилиштә Масақ йеза округида 4,5 МВт шамал электр станцияси селинип, униңға җәлип қилинған инвестицияниң көләми 2,6 миллиард тәңгә әтрапида. Түргүн дәриясидики қувити 1,4 МВт гидроэлектростанциягә көләми 300 миллион тәңгилик инвестиция сәрип қилинған. Бийил Сөгити йеза округида қувити 200 МВт, Масақ йеза округида қувити 55 МВт икки шамал электростанциясиниң, Ишиктә дәриясидики ГЭС каскадиниң қурулуши аяқлишиш алдида туриду. Кичик вә оттура тиҗарәт. Наһийә һакимийити тәрипидин тиҗарәтни риваҗландуруш йолидики барлиқ тосалғулуқларни мәнъий қилиш, тәкшүрүшләрни қисқартиш, бизнесни тәрәққий әткүзүш үчүн қолайлиқ шараитларни яритиш вә маддий қоллап-қувәтләш нәтиҗисидә кичик вә оттура тиҗарәт дурус йолға қоюлған. Мәсилән, «Бизнесниң йол хәритиси – 2020» программиси бойичә 1 миллиард 621 миллион тәңгилик 15 лайиһә мәбләғ билән тәминләнгән. Кичик вә оттура тиҗарәттин 4 миллиард 230 миллион тәңгә селиқ чүшүпту. Бу 2016-жили билән селиштурғанда 413 миллион тәңгигә артуқ. Инвестиция, қурулуш-монтаж ишлири. Наһийә ихтисадини тәрәққий әткүзүш мәхситидә 2017-жили 30 миллиард 600 миллион тәңгә инвестиция җәлип қилинипту. Өткән жили 14,2 миң квадрат метр турғун өй қурулуши планланған болса, әмәлиятта 15,4 миң квадрат метр турғун өй селинипту. Инфрақурулум. 2017-жили наһийә йоллирини җөндәш үчүн 1 655 миллион тәңгә бөлүнүп, 39,6 чақирим йол мурәккәп, 74,7 миң квадрат метр йол еқимдики ремонттин өткән. 2017-жили Ғулҗа вә Өрнәк йезилириға су трубилири тартилди. «Өңірлерді дамыту» программиси бойичә 14 йезида су трубилири еқимдики ремонттин өтүп, наһийә хәлқини су билән тәминләш 86 пайизға йәткән. Бийил Ават, Казатком, Екпинди вә Көлди йезилириниң су трубилириниң қурулушини жүргүзүш үчүн 650 миллион тәңгә бөлүнүпту. Өткән жили наһийәгә газ киргүзүш қолға елинди. Ишиктә шәһири билән Челәк йезисида дәсләпки истималчилар газ системисиға қошулди. Иш билән тәминләш, иҗтимаий қоллап-қувәтләш. Хәлиқни иш билән тәминләш мәхситидә 2017-жили 2420 йеңи иш орни ечилип, ишсизлар сани азайған. Наһийәдә оттура мааш миқдари 94,7 миң тәңгигә йетипту. 17600 адәмгә 405 миллион тәңгилик иҗтимаий ярдәм көрситилипту. Наһийәниң иш билән тәминләш мәркизи арқилиқ 1551 мүмкинчилиги чәкләнгән адәм ишқа орунлаштурулған. 183 Улуқ Вәтән урушиниң ветераниға вә нака балиларға санатория-курортларда давалиниши үчүн йолланма берилгән. Маарип. Мәктәп тамамлиғучилириниң Миллий биртуташ тесттики көрсәткүчи 83,2 баллни тәшкил қипту. Бу 2016-жилға қариғанда 1,2 баллға жуқури. 74 оқуғучи «Алтун бәлгү» саһиби аталса, 61 оқуғучи алаһидә шаһадәтнамигә еришкән. 321 түләк алий оқуш орниға грантқа оқушқа чүшүпту. 2017-жили Ишиктә шәһиридә вә Челәк йезисида 600 орунлуқ йеңи мәктәпләр ечилған. Алға йезисида 50 орунлуқ ихчам мәркизи бар 300 орунлуқ, Жаңашаруа йезисида 120 орунлуқ мәктәп беналириниң, Ават йезисидики Өмәр Муһәммәдий намидики оттура мәктивигә қошумчә 300 орунлуқ бенаниң, Өрикти йезиси оттура мәктивигә қошумчә 300 орунлуқ бенаниң қурулуш ишлири башланди. Нәтиҗидә наһийәдики үч сменилиқ мәктәпләрниң сани бәлгүлүк дәриҗидә қисқирайдиған болиду. Саламәтликни сақлаш саһаси. 2017-жили наһийәниң медицина хадимлири 1 миллион 82 миң адәмгә медицинилиқ ярдәм көрситипту. Бу көрсәткүч 2016-жили билән селиштурғанда 3,7 пайизға өскән. Наһийәдә жүрәк қан томурлири, хәтәрлик ишшиқ вә сил ағриқлириға дучар болғанларниң сани азийип, ана өлүмни қисқартиш йолида сезиләрлик утуқлар қолға кәлтүрүлмәктә. Шундақла гепатит, сил, бруцеллез ағриқлириниң азайғанлиғи байқилиду. Әмгәкчиқазақ наһийәси.

127 рет

көрсетілді

0

пікір
Алдыңғы мақала Илгириләш бар, камчилиқ түзитилиду
Келесі мақала Бирлик бар йәрдә, Бәрикәт болиду

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

13 Қаңтар, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы