• Спорт
• 15 Ақпан, 2018

Һазирчә бирла медаль

Шөһрәт МӘСИМОВ, «Уйғур авази»/ Гезитимизниң өткән санида хәвәр қилинғинидәк, Җәнубий Кореяниң Пхёнчхан шәһиридә ХХІІ қишлиқ Олимпиада оюнлири башлинип, бирнәччә медаль-комплектлириниң саһиблириму мәлум болди. Кишини хошал қилидиғини, Оюнлар ғалиплириниң арисида жутдишимиз, фристайл маһири Юлия Галышеваму бар. У фристайл-могул бойичә күч синишип, Қазақстан командисиниң ғоҗиниға һазирчә дәсләпки бронза медалини салди. Әскә салимизки, бу қазақстанлиқлар спортниң мошу түри бойичә Олимпиада оюнлирида алған биринчи медальдур. Шәрқий Қазақстан вәкили финалға биринчи квалификациядинла чиқти. Биринчи финаллиқ басқучта Юлия 75,10 балл топлап йәттинчи нәтиҗә көрсәтти. Иккинчисидә өз нәтиҗисини бираз яхшилап – 76,81 балл – алтинчи орундин күчлүк алтиликкә илинди вә медаль үчүн күрәшни давамлаштурди. Әнди үчинчи финаллиқ басқучта болса, 77,40 баллға еришип, нәтиҗидә мукапатлиқ үчинчи орунни егилиди. Мәлумки, 25 яшлиқ Юлия Галышева үчинчи қетим Олимпиада оюнлириға қатнашмақта. 2010-жили у он биринчи, 2014-жили болса, йәттинчи орунни егилигән еди. Юлия Галышеваниң Җәнубий Кореядә қолға кәлтүргән утуқлири тоғрилиқ гәп қилғанда, Америкиниң Chicago Tribune гезитиниң жутдишимизниң оюнини алаһидә тилға алғанлиғини қошумчә қилғумиз келиду. «Қазақстанлиқ Юлия Галышева өткән айда Ютадики мусабиқиләрдә қолини сундурувалғиниға қаримай, өз мәмликити үчүн бронза медалини елип кәлди...», дәп язиду гезит. Юлияниң утуғини Қазақстан Җумһурийитиниң мәдәнийәт вә спорт министри Арыстанбек Мухамедиулыму жуқури баһалиди. «Әлвәттә, Юлияниң утуғи бизни алаһидә һаяҗанландурди. Қазақстан үчүн бу чоң мәйрәм. Чүнки фристайл-могул охшаш мурәккәп спорт түри Қазақстанда әндила тәрәққий етиватиду. Юлиягә миңларчә тәшәккүр. Бу униң вә пүткүл Қазақстанниң утуғи. Яшисун Қазақстан! Алға!», деди министр. ХХІІ қишлиқ Олимпиада оюнлирида умумий командилиқ һесапта Германия (6 алтун, 2 күмүч, 2 бронза медаль), Голландия (5, 4, 2), Америка Қошма Штатлири (4, 1, 2) дәсләпки үч орунда келиватиду. Қазақстан болса, 19-орунда.