• Әхбаратлар еқими
• 22 Ақпан, 2018

Төмүр йол вокзали – шәһәрниң үзи

Алмута-1 төмүр йол вокзали 2019 – 2020-жиллири мурәккәп ремонттин өтидиған болди, дейилиду Алмута шәһири һакимийити таратқан мәхсус мәтбуат әвәрнамисида. «Вокзалниң чедиридин тамча өтидиғанлиғи раст, перронлар начар әһвалда. Бу вә башқиму камчилиқларни түзитиш үчүн бийил униң лайиһә-смета һөҗҗәтлири тәйярлиниши керәк. Һазирчә униңға қанчә мәбләғ тәләп қилинидиғанлиғи ениқ әмәс. Лайиһә-смета һөҗҗәтлири тәйяр болғандин кейин, 2019 – 2020-жиллири Алмута-1 вокзалида мурәккәп ремонт ишлири башлиниду», дәп ейтти Алмута шәһири һакиминиң аһали билән болған учришишида КТЖ вәкили. Шәһәр һакими Бауржан Байбек мәхсус комиссия тәшкил қилип, униң әзалири билән вокзални йәнә бир қетим арилап чиқиш керәклигини изһар қилди. «Вокзал илгири базарға айлинип қалған еди. Биз нурғунлиған сода орунлирини яптуқ. Йолувчиларниң вокзалға кириши вә чиқиши мүмкинқәдәр қолайлиқ болуши керәк. Әң муһим проблема, поездлар иккинчи вә үчинчи йөнилишкә тохтайду. Йолувчилар болса, әски көрүк арқилиқ өтиду. Вокзал – шәһиримизниң үзи. Алмутиға поезд арқилиқ һәр күни миңлиған адәм келиду. Әнди вокзалниң бүгүнки әһвалини көрүп, улар қандақ ойда болуп қелиши мүмкин?» дәп өз наразилиғини изһар қилди шәһәр һакими. Буниңдин алтә жил илгири мурәккәп ремонттин кейин Алмута-2 вокзали ечилди. Шу чағда ремонт пәйтидә алмутилиқларниң барлиқ тәләп-тәклиплири инавәткә елинғанлиғи, бехәтәрликниң вә хизмәтниң барлиқ заманивий тәләплири өз әксини тапқанлиғи хәвәр қилинған еди. Алмута-1 вокзалидиму шундақ болиду дәп күтүлмәктә.