• Әхбаратлар еқими
• 22 Ақпан, 2018

Алмута вилайитидә йеңи икки наһийә қурулиду

Бир чоң наһийәни иккигә бөлүш арқилиқ Алмута вилайитидә йеңи икки наһийә қурулиду. Бу һәққидә «Казинформ» агентлиғи хәвәр қилди. Вилайәттә чоң наһийә һесаплинидиған Райымбек наһийәсини иккигә бөлүш тоғрилиқ мәсилә Алмута вилайитиниң һакими Амандық Баталовниң һесават жиғинида көтирилди. «Биз вилайәтлик һакимийәт вә мәслиһәт дәриҗисидә мошундақ қарарни қобул қилип, мәркәзгә әвәттуқ. Барлиқ һаҗәт болған һесаплашларни жүргүздуқ. Алдин-ала тәхминләр бойичә, бу мәхсәт үчүн 2,4 миллиард тәңгә, шуниң ичидә 800 миллион тәңгә йәрлик бюджеттин җәлип қилиниду. Мәхсус комиссия дөләт мәһкимилири үчүн қандақ беналарниң керәклигини ениқлиди. Һазир уларниң лайиһилирини тәйярлаватимиз. Шәхсән өзәм мошу мәсилә бойичә Астанада Президентниң қатнишиши билән өткән мәҗлискә қатнаштим. Шундақ қилип, мәркизи Кеген йезиси билән Кеген наһийәсини вә мәркизи Нарынқол йезиси билән Райымбек наһийәсини қуруш тоғрилиқ қарар қобул қилинди. Дөләт рәһбириниң Пәрмани пат-йеқинда елан қилиниду», деди вилайәт һакими.