- Спорт
- 01 Наурыз, 2018
Олимпиада пәллисигә йәтти
Шөһрәт МӘСИМОВ,“Уйғур авази”/ Өткән йәкшәнбә күни Җәнубий Кореяниң Пхёнчхан шәһиридә ХХІІІ қишлиқ Олимпиада оюнлири тамамланди.Бу оюнларда Қазақстан бирла медальға еришти – Юлия Галышева спортниң фристайл-могул түри бойичә күч синишип, бронза медалини йеңивалди. Униңдин ташқири шорт-трекчи жигитләр – Денис Никиша, Нурберген Жумағазиев, Абзал Ажғалиев вә Еркебулан Шамуханов – 5000 метрлиқ эстафетида дәсләпки алтиликкә кирди.
Әнди Қазақстан болса, умумий командилиқ һесапта 28-орунға қанаәт һасил қилди.
Шундақ қилип, Юлия Галышева җумһурийәт Һөкүмитиниң тохтамиға мувапиқ, Олимпиадида егилигән үчинчи орун үчүн 75 миң АҚШ доллири билән мукапатлиниду.
Униңдин ташқири дәсләпки алтиликкә киргән шорт-трекчи жигитләрму 5 миң доллар миқдарида мукапат пулиға еришиду.
Бу йәрдә Юлия Галышеваниң үч мәшиқләндүргүчисигә 75 миң доллар, шорт-трекчи жигитләр мәшиқләндүргүчилиригә 15 миң доллар бөлүп берилиду.
Шундақ қилип, бийилқи Олимпиада йәкүни бойичә Қазақстан спортчилар билән мәшиқләндүргүчиләргә умумий миқдарда 185 миң доллар, йәни – 59 миллион 105 миң тәңгидин ошуқ мукапат пули төләйду. Барлиқ ахча җумһурийәт бюджетидин әвәтилиду.
Умумий командилиқ һесапта биринчи орунни Норвегия – 39 медаль (14 алтун, 14 күмүч, 11 бронза), иккинчи орунни Германия – 31 медаль (14, 10, 7), үчинчи орунни Канада 29 медаль (11, 8 10) билән егилиди.
Новәттики қишлиқ Оюнлар 2022-жили Беҗинда өтиду.
200 рет
көрсетілді0
пікір