• Спорт
• 07 Наурыз, 2018

Яш палванға ақ йол!

И.Саттаров намидики Ғәйрәт оттура мәктивидә спортниң әркин күрәш түригә қизиқидиған қизлар нурғун. Уларниң арисидин Маһирәм Абдукәримова һәммидин бөсүп чиқмақта. Бәшинчи синиптин башлап əркин күрәш билән мәшиқлиниватқан Маһирәмдин устази Турсун Қурбановму чоң үмүт күткән еди. Сәвәви, Маһирәм кичигидин зерәк һәм қавул қиз. Устази хаталашмиди. Яш палван турақлиқ наһийәлик, вилайәтлик мусабиқиләрдә мукапатлиқ орунлардин көрүнүп кәлди. Маһирәм бийил Талдиқорған шәһиридики өсмүрләргә беғишланған спорт мәктивигә қобул қилинди. Тиришчан қиз аз вақит ичидила тинмай мәшиқлинип, нәтиҗидә Қазақстан чемпионати үчүн таллавелиш турнирида ғалип чиқти. Йеқинда Маңғистав шәһиридин хуш хәвәр кәлди. Маһирәм җумһурийәтлик мусабиқидә иккинчи орунға егә бопту. — Қизимизниң утуғидин бешимиз көккә йәтти, — дәйду униң ата-аниси Розмәһәмәт вә Адаләт Сәйдуллаевлар. — Мән устазлиримдин миннәтдар, — дәйду Маһирәм. — Мәзкүр чемпионаттин кейин мән «спорт маһирлиғиға намзат» нормативини орунлидим. Əнди устазлиримниң, туғулған жутумниң үмүтини ақлаш үчүн бар күч-ғәйритимни сәрип қилимән. Өз новитидә, бизму Маһирәмгә «Беқиндурар егиз чоққилириңиз көп болғай» дегән тиләк-истәклиримизни билдүримиз. Абдулҗан АЗНИБАҚИЕВ. Əмгәкчиқазақ наһийәси.