• Әхбаратлар еқими
  • 07 Наурыз, 2018

Он тоққуз балиниң аниси

Сабирәм ӘНВӘРОВА, «Уйғур авази»/ Дилбирим аниниң исмини жутдашлири алаһидә һөрмәт-еһтирам билән тилға алиду. Чүнки у бир әмәс, он әмәс, он тоққуз балиниң аниси. Дилбирим Шавдунова 1939-жили дунияға келип, Ават оттура мәктивини тамамлиған. Балилиқ дәври қийин жилларға тоғра келип, кичигидин әмгәк билән тавлинип өсиду. 1958-жили, йәни 19 йешида, турмушқа чиқиду. Йәттә бала сөйүп, бағриға басиду. Бирақ, «язмиштин озмиш йоқ» демәкчи, тәғдирниң қисмити билән йолдиши әтигән аләмдин өтиду. Шу бир қийин заманларда ана 7 балиси билән тул қалиду. Бүгүнки заманниң бәзибир қиз-келинлиридәк балилиридин баш тартмайду, әксичә, һәм ана, һәм ата болушқа тиришиду. Тәғдирниң язмишини қараң, шу чағларда, 8 пәрзәнди бар Наман Заманов исимлиқ киши өмүрлүк яридин айрилип қалиду. Бир аилигә аниниң, бир аилигә атиниң йетишмәйватқанлиғини чүшәнгән тонушлири Дилбирим ана билән Наман атиниң бешини қошуп қойиду. Мана, шундақ қилип, улар 15 балиниң ата-анисиға айлиниду. Дилбирим аниниң Гүлбаһар, Саһидәм, Селимәм, Рашидин, Шәмшидин, Саҗидәм, Тәләпхан исимлиқ 5 қиз, 2 оғул билән Наман атиниң Нурәхмәт, Мирзәхмәт, Маһирәм, Ғоҗәхмәт, Шаяхмәт, Нариман, Саһинур, Саһидәм исимлиқ 3 қиз 5 оғли җан-җигәр қериндашлардәк болуп кетиду. Ата-аниму «сениң», «мениң» демәй балилирини иҗил-инақлиққа тәрбийиләйду. Кейин улар йәнә Гүлбадәм, Гүлназәм, Гүлнарәм, Әрмидин исимлиқ 4 пәрзәнт сөйүп, бир өйдә 19 балини беқип-қақиду. Барлиғини оқутуп, путида дәс турғузиду. – Қийин болмиди әмәс, 19 балиниң тамиғи, кийим-кечиги, оқуши, керәк-яриғи бар дегәндәк... Бирақ йолдишим иккимиз шу қийинчилиқларни бирлишип йәңдуқ. Балилиримизға житиқ, ямақ кийим кийгүзмидуқ, бирдә тоқ, бирдә ач қоймидуқ. Муһими, барлиғиға бирдәк меһримизни төкүп, чоң қилдуқ. Пешанигә йезилғини шу охшайду, Наман 2001-жили бақилиқ болди. Шуниңдин бери, пәрзәнтлиримгә атисиниң йоқлуғини билиндүрмәсликкә тиришип келиватимән. «Һәр җапаниң өзигә чүшлуқ һалавити бар» дәп конилар бекар ейтмапту. Бүгүн меһнитим ақлинип, балилиримниң дөлитидә яшаватимән. 19 балиниң аниси болғанлиғимни Алланиң маңа бәргән бәхти дәп билимән, қизим, – дәйду меһриван ана. Балиларниң әң чоңи Нурәхмәт 67 яшта, кәнҗиси Әрмидин 35 яшта болса, нәврилиридин әң чоңи Рамиль Заманов 45 яшта, әң кичик нәвриси Арлен 3 яшта екән. Чәврилириниң чоңи Расим 18 яшта болса, әң кичик чәвриси Альмира техи йеқиндила дунияға кәпту. Бу күнләрдә йеши сәксәнгә йеқинлашқан Дилбирим аниниң җәми 58 нәвриси һәм 58 чәвриси бар екән. Наман ата билән Дилбирим ана өз вақтида мал билән мәшғул болуп, тирикчилик қилған екән. 1989-жили һөрмәтлик дәм елишқа чиққан Дилбирим ана «Қәһриман Ана» атиғиға еришип, «Алтун һалқиға» сазавәр болди. Әсли, униңға мундақ орден-медальниң йүзини тақисиму әрзийду. Тәбиитидин назук, бағри юмшақ, аҗиз яритилған аялниң жүригидә қолиға милтиқ елип, җәңгә киридиған оғул балидәк қәһриманлиқ роһ, сунмас ирадә, муһиттәк төзүм йошурунған. – Ана – улуқ нам. Бирақ бала туққан аялниң барлиғи «ана» әмәс. Бәлки, балиға ақ сүт берип, меһиргә бөлигән, әлләйләп, түн уйқисини төрт бөлгән, бағрини йерип чиққан пәрзәнди үчүн җенини беришкә тәйяр турған аялларла «ана» дәп намға мунасип. Бала – әң чоң байлиқ. Мениң бүгүнки қаракөз қизлиримизға берәр анилиқ мәслиһитим, шу «Ана» дегән улуқ намға һәрқачан лайиқ болуңлар, – деди ана мениң билән хошлишиветип.

470 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы