• Яшлар вә вақит
• 07 Наурыз, 2018

Бостанға – ақ йол!

Рашидәм РӘҺМАНОВА, «Уйғур авази»/ Әмгәкчиқазақ наһийәсиниң һакими Бинәли Ысқақ билән болған сөһбитимиз давамида Бинәли Әбдиқапасулы һазирқи яшларниң алаһидиликлири билән камчилиқлириға тохтилип, дөләт хадимлириниң тест тапшурған пәйтидә жуқури билими, дөләт хадимлириниң этикиси вә эстетикисини маһир өзләштүргән уйғур қизи, Тәшкәнсаз йеза округи аппаратиниң баш мутәхәссиси Бостан Ниязова һәққидә алаһидә тәвринип сөзләп бәргән еди.Һәқиқәтәнму, Бостан – ички дунияси сиртқи қияпитигә ярашқан, «чоңға – һөрмәт, кичиккә – иззәт» билән қарашни билидиған қизлиримизниң бири. Өзи туғулуп өскән Тәшкәнсаздики Һезмәт Абдуллин намидики оттура мәктәпни әла баһалар билән тамамлап, Қазақ дөләт қизлар университетиниң гуманитарлиқ-ихтисадий факультетида тәһсил көрди. Мәктәптиму, университеттиму көпниң һөрмитигә сазавәр болған. 2014-жили Бостан дөләт хадимлириниң «В» корпуси бойичә тест тапшуруп, 104 бал топлап, ишқа орунлашти. Үч жилдин бери Тәшкәнсаз йеза округи һакими аппаратиниң баш мутәхәссиси сүпитидә ана жутида әстаидил хизмәт қилип келиватиду. Кәспий маһаритиму өсти. Бостан дөләт хадимлири тестини ахирқи қетим Алмута вилайитиниң мәркизи Талдиқорған шәһиридә тапшуруп, «В» корпусиға өтти. Көпчиликниң ишәнчисигә еришкән Бостанниң бирла армини бар: анисиниң вапатидин кейин өзигә һәм ата, һәм ана болған дадиси Һакимҗан акиниң арзу-үмүтлирини ақлаш. Биз Бостанға «апирин» ейтип, келәчәктә буниңдинму чоң чоққилардин көрүнүшигә тиләкдашлиқ билдүримиз. Әмгәкчиқазақ наһийәси.