• Әхбаратлар еқими
• 07 Наурыз, 2018

Чернобыль қатнашқучилириға һөрмәт көрситилди

Гөһәрбүви ИСМАЙИЛҖАНОВА, «Уйғур авази»/ 1986-жили йүз бәргән Чернобыль апитиниң ақивәтлирини йоқитишқа 600 000 адәм қатнашқан екән. Уларниң 32 000 қазақстанлиқлар болса, бүгүн улардин пәқәт 4519 адәмла һаят екән. Җүмлидин Панфилов наһийәсидә Чернобыль һалакити вә шуниңдәк башқиму техногенлиқ вәзийәтләрдә өзиниң әмәс, өзгиниң тәғдири үчүн җан атқан 29 әр жүрәк жутдишимиз бар. Йеқинда наһийә рәһбәрлиги, җамаәтчилик вәкиллири, җәмийәтлик тәшкилатлар әзалири, колледж студентлири иштракида наһийәлик һакимийәтниң мәҗлисләр залида чернобыльчи-жутдашлар билән баш қошуш болуп өтти. Наһийә һакиминиң орунбасари Думан Төреханов Чернобыль апити пәйтидә җасарәт үлгисини көрсәткән кеңәш адәмлириниң қәһриманлиғи һәққидә ейтип, апәт ақивәтлирини йоқитишқа қатнашқан жутдашларға саламәтлик вә аиләвий хатирҗәмлик тилиди. Шуниңдин кейин “Алмута вилайәтлик Чернобыль апити ветеранлири вә накалири” җәмийәтлик кеңишиниң рәиси Қусайын Мустафа атом электр станциясидә йүз бәргән апәт вә униң ақивәтлири һәққидә тәпсилий тохтилип, атом һалакитиниң қурванлирини әскә алди. Һәрқандақ әлдә ядро вә атом ихтидариниң течлиқсөйәр әлгә елип келидиған азап-оқубәтлирини ечинишлиқ билән тәкитләп, Чернобыль һалакитигә қатнашқан жутдашлиримизға «Участник ликвидации последствий аварии на ЧАЭС» медалини тапшурди. Наһийәлик Анилар кеңиши рәисиниң орунбасари Қурванбүви Һашимова, Яркәнт гуманитарлиқ техникилиқ колледжиниң 3-курс студенти Сағи Молдақул, Панфилов наһийәлик чернобыльчилар җәмийитиниң рәиси Мықтыбек Сидиқжанов вә башқилар Чернобыль һалакитигә қатнишип, өзиниң әмәс, өзгиләрниң тәғдири үчүн күрәшкән әр жүрәк адәмләрниң қайтмас ирадиси, қәйсәрлигигә апирин әйләп, уларниң әрлиги яш әвлатқа үлгә-нәмунә болуп қалидиғанлиғини тәкитлиди. Панфилов наһийәси.