• Асасий мақалилар
• 07 Наурыз, 2018

«Қазақстан — бизниң умумий өйүмиз»

Мәшүр САСИҚОВ, «Уйғур авази»/ Йеқинда Алмута шәһиридики «Достлуқ өйидә» 1-март – Миннәтдарлиқ күнигә беғишланған «Қазақстан — бизниң умумий өйүмиз» намлиқ фестиваль болуп өтти. Униңға Алмута шәһәрлик һакимийәттин вәкилләр, бирқатар этномәдәнийәт мәркәзлириниң рәһбәрлири вә Қазақстан хәлқи Ассамблеяси тәркивидики иҗадий топлар билән аммивий әхбарат васитилириниң хадимлири қатнашти. «Достлуқ өйиниң» фойесида меһманлар һөрмитигә этномәдәнийәт мәркәзлири тәрипидин миллий таамлар, кийим-кечәкләр вә әмәлий-сәнъәт көргәзмилири уюштурулди. Шундақла бу йәргә Қазақстан Җумһурийити Президенти Архивидин һәм Ассамблея тарихидин учур беридиған һөҗҗәтләрму қоюлди. Мәрасимда сөзгә чиққан Алмута шәһири һакиминиң орунбасари Арман Қырықбаев, Қазақстан хәлқи Ассамблеяси Рәисиниң орунбасари Абильфас Хамедов, ҚҖ Президенти Архивиниң мудири, техника пәнлириниң доктори Борис Жаппаров вә Алмута шәһәрлик корейлар этномәдәнийәт мәркизиниң рәиси Бронислав Шин меһманларни мәйрәм билән тәбрикләп, елимиздики милләтләрара разимәнликниң башқиларға үлгә екәнлигини алаһидә тәкитлиди. Шуниң билән биллә, улар Миннәтдарлиқ күниниң үчинчи қетим нишанлиниватқанлиғини тилға алған һалда, бу мәйрәмниң қазақстанлиқларниң өзара достлуғини вә инақлиғини ипадиләйдиған қутлуқ сәнә екәнлигини алаһидә тәкитлиди. Ейтиш керәкки, мәзкүр мәйрәмниң 1-март күни нишанлиниши тәсадипи әмәс. Чүнки бу Қазақстанда истиқамәт қиливатқан 130дин ошуқ милләт билән этносниң бешини қошуватқан Қазақстан хәлқи Ассамблеяси қурулған күн. Униң хәлиқләр достлуғини риваҗландуруштики ролиниң, әһмийитиниң нәқәдәр үстүнлүги әхбарат васитилиридә әтраплиқ йорутулуп келиватиду. Мәрасим ахири эстрада юлтузлири билән иҗадий коллективлар тәрипидин тәйярланған концертлиқ программиға улашти.