• Замандаш
• 07 Наурыз, 2018

Әмгиги мунасип баһаланди

Гөһәрбүви ИСМАЙИЛҖАНОВА, «Уйғур авази»/ Панфилов наһийәсиниң Пәхрий граждини Ризайдин Әйсаев наһийәдики әң чоң билим дәргаһлиридин һесапланған Жамбул Жабаев намидики мәктәптә мудирдиқ қилип кәлмәктә. Үч тилда, йәни уйғур, қазақ вә рус тиллирида билим бериливатқан мәктәптә 1500 оқуғучиға 130дин ошуқ алий вә кәспий билимгә егә муәллим сүпәтлик билим вә аңлиқ тәрбийә бериш йолида жүклиниватқан җавапкәрликни жуқури һис қилип, тиришчанлиқ билән әмгәк қиливатиду.Мәзкүр мәткәптә хәлиқләр достлуғи мавзусиға өтүлүватқан чариләр һәркимни қайил қилиду. Мәктәптә билим еливатқан он үч милләтниң вәкиллири бир аилиниң балилиридәк хәлиқләр достлуғи билән бирлигини намайиш қилип кәлмәктә. Биз униңға һәр қәдәмдә көз йәткүзүватимиз. Һәрхил мәйрәмләрдә уюштурулуватқан чарә-тәдбирләргә хошна наһийәләр билән вилайәттин меһманлар тәклип қилинип, мудирниң иш тәҗрибиси тәрғип қилинмақта. Мана шундақ тәҗрибилик мудирниң әмгиги мунасип баһасини тапмақта. У «Бауыржан Момышулы», «Лидер образования», И.Алтынсарин медальлири билән тәғдирләнди. Йеқинда устаз хәлиқләр достлуғини, мустәһкәмләшкә қошуватқан һәссиси үчүн Қазақстан хәлқи Ассамблеясиниң «Бірлік» алтун медали вә «Һөрмәт грамотиси» билән тәғдирләнди. Шу мунасивәт билән Ризайдин Сейит оғлини ушбу хошаллиғи билән тәбрикләп, ишиға утуқ тиләймиз. Панфилов наһийәси. СҮРӘТТӘ: Алмута вилайитиниң һакими Амандиқ Баталов Ризайдин Әйсаевқа «Бірлік» алтун медалини тапшуруватқан пәйт.