• Замандаш
• 16 Наурыз, 2018

Аминәм анини йоқлап барди

Гөһәрбүви ИСМАЙИЛҖАНОВА, «Уйғур авази»/ Йеқинда «Нур Отан» партияси Панфилов наһийәлик шөбиси рәисиниң биринчи орунбасари Қанат Досмайилов, наһийә һакиминиң орунбасари Роза Мағрупова, Көктал йеза округиниң һакими Бақыт Нурелов Көктал йезисиниң турғуни, бир әсир гувачиси Аминәм Илиеваниң һалидин хәвәр елип қайтти. Аминәм Илиева 1918-жили 1-январьда Яркәнт шәһиридә дунияға кәлгән. 19 йешида Кевир Тайиров билән аилә қуруп, өй-отақлиқ болиду. Бәш пәрзәнт, 13 нәврә, 21 чәврә, 2 әврә сөйгән ана 1980-жили йолдишидин айрилип қалиду. Бүгүнки күндә аниниң қулиғиниң сәл еғирлишип қалғинини демисә, әстә сақлаш хатириси сағлам, киргән-чиққанни тонуйду. Ана у күни наһийә рәһбәрлигигә тәқипләш, Улуқ Вәтән уруш жиллири тартқан жапа-мәшәқәтлирини сөзләп бәрди. – Елимиздә сиз охшаш йүз яштин алқиған 415 ана Дөләт рәһбириниң Тәбрик хетини алди. Биз сизгә әйнә шу Президентимизниң рәһбәрлигидики «Нур Отан» партиясиниң тәбрикнамиси билән соғисини елип кәлдуқ. Сизгә мустәһкәм саламәтлик, аилиңизгә хатирҗәмлик тиләймиз, –деди Қанат Досмайилов. Наһийә һакиминиң орунбасари наһийәдин икки ана бу хилдики тәбрик хәт билән соғиларни тапшуруш һөрмитигә егә болуватқанлиғини мәмнунийәт билән тилға алди вә йүз яшлиқ аниға өзиниң тиләклирини изһар қилди. Аминәм Илиева оғли Абдукеримниң қолида туруветипту. Абдукерим ака билән келини Гүлзарә аниниң алдидин тоғра өтмәй, дуасини алмақта. Жут аниси бу күни уни тәбриклигүчиләргә миңларчә рәхмәт ейтип, анилиқ ақ тилигини изһар қилип, дуасини бәрди. Панфилов наһийәси.