• Әдәбият гүлзари
• 16 Наурыз, 2018

Журналниң йеңижиллиқ сани йоруқ көрди

Мәшүр САСИҚОВ, «Уйғур авази»/ Йеқинда аз вақит ичидә өз оқурмәнлирини тепип үлгәргән «Иҗаткар» әдәбий-публицистикилиқ, илмий-аммибап журналиниң йеңижиллиқ сани йоруқ көрди. Бир шаир акимиз ейтқинидәк, «гезит-журнал вә китап оқуйдиған» оқурмәнни бирдин җәлип қилиш хислитигә егә, безилишиму жуқури дәриҗидики журналниң муқависида ХХ әсирниң иккинчи йеримида Қазақстан уйғур әдәбиятиниң тәрәққиятиға зор төһпә қошқан көрнәклик язғучи Җамалидин Босақовниң рәсими берилгән. Журнал филология пәнлириниң намзити Дилшат Рәйһановниң «Дивани мәшрәб» қолязмисиниң бир нусхиси» намлиқ мақалиси билән башлиниду. Униңда 1640 – 1711-жиллири яшап иҗат әткән шаир Молла Вәли оғли Бабарәһим Мәшрәб һәққидики мақалида көплигән бүгүнгә қәдәр намәлум болған мәлуматлар вә шундақла униң әсәрлири тоғрилиқ әхбаратлар орун алған вә келәчәктә униң транскрипциясини чиқириш мәсилиси көтирилиду. Андин журналда Қазақстан Җумһурийитиниң хизмәт көрсәткән әрбаби Йолдаш Азаматовниң Җамалидин Босақовниң 100 жиллиғиға даир «Мундақ адәмни заводта буйрутма берипму ишләп чиқиралмаймиз» мавзусидики хатириси берилгән. Буниңдин ташқири, Җ.Босақовниң «Иштияқ» һекайисиниң һавалә қилиниши әдипниң иҗадийитигә қизиққучиларға соға десәк, ашурувәткәнлик әмәс. Чүнки етирап қилишимиз керәкки, һазир ундақ әсәрләрни йезиватқанлар камдин-кам. Оқурмән журнални оқуветип, прозидин пәйдин-пәй поэзияға көчидудә, шаир Нурәхмәт Әхмәтовниң «Дехан шаир» намлиқ мақалиси арқилиқ Хелил Һәмраев иҗадийити билән йеқиндин тонушиду. Әнди новәт актер, шаир, драматург, язғучи Шайим Шаваевқа кәлгәндә, униң әмгәк паалийити билән иҗадийитигә талантлиқ шаир акимиз Әхмәтҗан Исрапилов әтраплиқ тохтилип, әйнә шундақ көп қирлиқ инсанниң һаяттики аддийлиғиға, талантиға һәйран болған һалда, униң билән болған бирқатар учришишлирини хатириләп өтиду. Буниңға қошумчә, әдипниң «Интизарлиқ» намлиқ әсәри берилгән. Журналда оқурмән йәнә бир тонушидиған шәхс – атақлиқ шаир, чоңқур тәпәккүр егиси Мәһәмәтимин Обулқасимов. У яқ бийил 75 яшлиқ тәвәллудини нишанлаватиду. Журнал тәһрирати әдипни сәмимий тәбрикләч, униң «Бәзибир хәлиқ мақалилириға тәнқидий бир нәзәр» намлиқ мақалисини берипту. Муәллип, өз новитидә, айрим мақал-тәмсилләрдики сөзләрниң қайси тилдин елинғанлиғи, пәйда болуш тарихи вә уларниң мәнасиға һәм тоғра пайдилиниш һәққидики пикирлири билән ортақлишиду. Тәкитләш керәкки, журналда Йүсүпбәк Мухлисов, Тейипҗан Елиев, Қабдеш Жумадилов кәби жирик қәләм егилириниң әсәрлиридин ташқири, исми көпчиликкә унчивала тонуш әмәс һәвәскар шаир-язғучиларниңму әмгәклири орун алған. Мәдәнийәтшунаслиқ пәнлириниң намзити Һакимҗан Гүлиевниң «Мәркизий Азиядики уйғур тәсвирий сәнъити» намлиқ мақалиси уйғур рәссамлириниң бүгүнки паалийитидин дерәк бериду. Умумән, журналниң бу саниниң оқурмәнләр көңлидин чиқидиғанлиғи шүбһисиз.